Աշխարհի տարբեր երկրներից Հայաստան ժամանած 10 կամավորները 5 օրում մասնակցեցին և վերանորոգեցին Գեղարքունիքի մարզի Լճաշեն գյուղի բնակիչ Սեդա Բաբայանի բնակարանը:
Նրանց բոլորին միավորել է կամավոր սկզբունքներով այլ մարդկանց օգնելու ցանկությունը: Կամավորները բոլորն էլ տարբեր մասնագիտություններ ունեն, բայց դա չի խոչընդոտում աշխատանքում ներգրավվելու համար: Շինարարության մասնագետի օգնությամբ տեղում ծանոթանում և հմտանում են այդ գործում:
Ծրագիրը իրականացնում է Հաբիթաթ ֆոր Հյումենիթի Արմենիա հիմնադրամը:
Կամավորների թիմը ղեկավարում է Ռոսալինդ Հարբերը (Սլովակիա): Նա նշում է, որ կամավորական այս աշխատանքի մասին հայտարարությունը տարածել է ինտերնետում, անդամները սկսել են կապվել նրա հետ, և կազմավորվել է խումբը : Ռոսալդինը նշում է. «Մենք կարող էինք մեր հանգիստը կազմակերպել Գերմանիայում, Ֆրանսիայում… բայց մենք նաև ուզում ենք օգտակար լինել մարդկանց»:
Մայքլը(ԱՄՆ) իր կնոջ և տղայի հետ է եկել Հայաստան մասնակցելու կամավորական աշխատանքին: «Մեր ընտանիքը սովորություն ունի կամավորական աշխատանքով զբաղվելու և մենք հավատում ենք կամավորությանը»,-նշում է Մայքլը: «Մենք նաև հետաքրքրված ենք այլ երկրների մասին իմանալու, եկանք Հայաստան` օգնելու մարդկանց և ծանոթանալու երկրին»:
Մերի Հարբերը(Անգլիա) մասնագիտությամբ իրավաբան է, նշում է, որ դժվար է չլինելով մասնագետ` շինարարություն անել.«Բայց շինարարության ղեկավարը լավ ուսուցանող է, օգնում է մեզ, հետևում է, ուղղում է աշխատանքը»: «Հայաստանը նախկինում չէի տեսել, այն հետաքրքրիր երկիր է: Ընտանիքը շատ հաճելի է, և հրաշալի սնունդ են մեզ հյուրասիրում»:
«Կամավորների ներգրավումը ընտանիքներում հնարավորություն է տալիս ավելի մատչելի դարձնելու տան շինարարությունը: Նրանք գումար են խնայում շինարարությունը կազմակերպելիս: Սկզբում գալիս են բոլորովին անծանոթ, բայց մի քանի օր աշխատելուց հետո դառնում են ընկերներ, բարեկամներ»,- նշում է Հաբիթաթ ֆոր Հյումենիթի Արմենիայի Ռեսուրսների զարգացման ղեկավար Սեդա Արզումանյանը:
Գևորգ(ուսանող, Հայաստան) «Ես միշտ մտածել եմ, որ բոլորս ի վերջո նույն մոլորակի մարդիկ ենք, եթե հնարավոր է, կարող ես մեկին օգնես, ինչո՞ւ չանես: Ինձ համար սա նոր փորձ էր. նոր մարդկանց հետ շփվել, տարբեր բաներից խոսել, նաև հետաքրքիր էր իմանալ, թե գյուղի մարդիկ ինչի կարիքն ունեն, ինչպես են ապրում…
Սեդա Բաբայանը` տան տիկինը, շատ է մտերմացել կամավորների հետ: Իր ցանկությունն է հայտնում հաջորդ տարի ևս հյուրընկալելու նրանց, բայց արդեն հյուրի կարգավիճակով:
Ի դեպ, եթե դուք նույնպես կամավորական աշխատանքով սիրում եք զբաղվել, օգնել մարդկանց, ապա կարող եք միանալ կամավորներին և օգնել ցածր եկամուտ ունեցող հայ ընտանիքներին` բարելավելու իրենց բնակարանային պայմանները:
Արփինե Արզումանյան` mynews.am
