Երեկ երեկոյան ժամը 22:00-ի սահմաններում Կապան քաղաքի Մինաս Պապյան փողոցի ջրատար խողովակը վթարվել էր, ինչի հետեւանքով ջրերն ամբողջությամբ ողողել էին թաղամասի շենքերի բակերը, դժվարանցանելի դարձրել ճանապարհը` առաջացնելով բնակիչների դժգոհությունը: Վթարի հետաեւանքով խախտվել էր նաեւ թաղամասի 5 շենքերի խմելու ջրի ջրագրաֆիկը: «Շենքի հայաթով քայլել չէր լինում, կոշիկները հանում էինք ու ոտաբոբիկ էդ ջրերի մեջով անցնելով ներս մտնում շենք: Երեկվանից էս վիճակն է», – բողոքում են թաղամասի բնակիչները: «Հայջրմուղկոյուղի» ՓԲԸ հարավային մասնաճյուղի «Կապան» տեղամասի պետ Հովհաննես Գեւորգյանը «Առավոտին» փոխանցեց, որ արդեն երկու անգամ վթարը վերացրել են, բայց համապատասխան դետալի անորակ լինելու պատճառով իրավիճակը հնարավոր չի եղել շտկել վերջնականապես: «Այս պահին կրկին աշխատանքներ ենք տանում վթարի վայրում եւ ամենաուշը մեկ կամ մեկուկես ժամից վթարը կվերացնենք, բայց խնդիրը վերջնական հնարավոր կլինի լուծել միայն երկուշաբթի օրը` վնասված խողովակը նորով փոխարինելով: Իսկ ջրագրաֆիկն հենց այսօր կվերականգնվի թաղամասի այդ 5 բնակելի շենքերում», – պարզաբանում է Հովհաննես Գեւորգյանը:
Դեպքի վայրը լուսանկարելու պահին շենքերի բակերով ջրեր արդեն չէին հոսում, քանի որ ջրմուղը վթարի վերացման տարբերակ արդեն իսկ գտել էր:
Մերի ՍՈՂՈՄՈՆՅԱՆ
Կարդացեք նաև