Դեռ հունիսի կեսերին «Աքիլլես» ՀԿ-ի նախագահ Էդուարդ Հովհաննիսյանն ահազանգեց, որ ճանապարհային ոստիկանությունը խախտել է ՀՀ կառավարության կողմից սահմանված կանոնակարգը: Ըստ պարոն Հովհաննիսյանի՝ Երևանի Ռուբինյանց փողոցում տեղադրված տեսախցիկի մասին վարորդները տեղյակ չեն՝ տեղադրման դիրքի պատճառով: Այնինչ տուգանքներն ահռելի գումարներ են կազմում: Է. Հովհաննիսյանը ժամանակին հայտարարեց, թե ուսումնասիրություններից պարզվել է, որ տեսախցիկը ծառի թփով ծածկված է եղել: Այս հայտարարությունից հետո ՀՀ Ճանապարհային ոստիկանությունը հայտարարեց, որ Ռուբինյանց փողոցի գրանցված խախտումները, որոշակի ժամանակահատվածում գրանցված, չեղյալ են համարվում: Ուստի այն վարորդները, ովքեր արդեն վճարել են տուգանքները, ետ կստանան գումարները, դեռ չվճարած վարորդներն էլ կազատվեն տուգանք վճարելու պարտականությունից:
Aravot.am-ին այս օրերին դիմում են մի շարք վարորդներ, ովքեր դժգոհում են, թե իրենց վճարած գումարներն այդպես էլ չեն վերադարձվել: Ուստի կապ հաստատեցինք ՃՈ խախտումների արձանագրման կենտրոնի պետ Արմեն Սարգսյանի հետ: Նա փոխանցեց. «Գրանցվել էր շուրջ 2100 խախտում, ուստի թվից էլ երևում է, որ խախտումների ծավալը բավականին մեծ է: Այս պատճառով էլ գործընթացը ժամանակ է պահանջում: Մինչ այժմ հայտնաբերվել են բոլոր այն քաղաքացիները, ում խախտումները չեղյալ են համարվում, և հերթականությամբ վերադարձվել են նրանց վճարած գումարները: Ուստի պետք չէ անհանգստանալ, քանի որ գործընթացը դեռ շարունակվում է, հուսով ենք, մեկ շաբաթից, տասն օրվա ընթացքում այն ավարտին կհասցվի»:
Տաթև ՀԱՐՈՒԹՅՈՒՆՅԱՆ
Կարդացեք նաև
