Շախմատի համաշխարհային օլիմպիադաներում թիմային մեդալներից զատ նաեւ այլ անվանակարգերի դափնեկիրներ են որոշվում: Առաջին խաղատախտակի առջեւ Լեւոն Արոնյանը 10 հնարավորից վաստակելով 7,0 միավոր, բոլոր մասնակից երկրների առաջատար շախմատիստների մեջ նվաճեց ոսկե մեդալը: Երկրորդ խաղատախտակի առջեւ թեեւ Սերգեյ Մովսիսյանը ցույց տվեց 50%-անոց արդյունք՝ 10-ից 5,0 միավոր, սակայն նա տարավ համաշխարհային օլիմպիադայում մեր հավաքականի ամենակարեւոր հաղթանակը՝ օլիմպիական ոսկի պարգևելով մեր ընտրանուն: Վլադիմիր Հակոբյանը, որ նույնպես բաց թողեց ընդամենը մեկ տուր, 7,5 միավորով երրորդ խաղատախտակների առջեւ հանդես եկածների մեջ դարձավ արծաթե մեդալակիր: Չորրորդ խաղատախտակի առջեւ Գաբրիել Սարգսյանը միակն էր, որ մասնակցեց բոլոր տուրերին: Նա կայուն մրցելույթներով վաստակեց 7,0 միավոր եւ ցույց տվեց յոթերորդ արդյունքը: Եվ վերջապես, Տիգրան Լ. Պետրոսյանը Ստամբուլում խաղատախտակի առջեւ նստեց ընդամենը երեք անգամ եւ իր անվան դիմաց գրանցեց 2,5 միավոր:
Համաշխարհային օլիմպիադայի կազմակերպիչները օլիմպիական եռակի չեմպիոն Հայաստանի տղամարդկանց հավաքականի մարզիչ Արշակ Պետրոսյանին երկրորդ անգամ ճանաչեցին աշխարհի լավագույն շախմատային մարզիչ:
Աշոտ ՀԱԿՈԲՅԱՆ