«Սասունցի Դավիթ» էպոսը մեր անձնագիրն է, մենք բոլորս պարտավոր ենք անգիր իմանալ մեր անձնագրի ամեն մի տառը»,-այդ մասին Վանաձորի Ստեփան Զորյանի անվան տուն-թանգարանում էպոսին նվիրված գրական միջոցառման ժամանակ ասաց ասմունքող Ջիվան Սարգսյանը:
Թեեւ այժմյան ինտերնետային դարում գիրք կարդալը դարձել է հազվադեպ երեւույթ, այնուամենայնիվ, ըստ Սարգսյանի, նաեւ նման նեղ միջոցառումներն են, որ մարդկանց ուղղորդում են դեպի գիրքը: «էպոսը մեզ ոգեղենացնում է, տալիս է մեզ զորեղություն, բարություն, բարձր որակներ սերմանում մեր մեջ: Ուստի մենք, որքան հնարավոր է, պետք է շատ ընթերցումներ կազմակերպենք»,-ասաց նա:
Թեեւ միջոցառման գլխավոր «մեղավորը» Վանաձորի օրն էր, տուն-թանգարանի տնօրեն Լենա Անթառանյանի խոսքերով այն կազմակերպելիս հաշվի է առնվել նաեւ այն հանգամանքը, որ 2012 թվականի նոյեմբերին ՅՈՒՆԵՍԿՕ-ն քննարկելու է ՀՀ-ի ներկայացրած «Սասնա ծռեր կամ Սասունցի Դավիթ» էպոսը եւ նրա կատարողական դրսեւորումները» հայտը:
«Մենք եւս ձեռնամուխ եղանք էպոսին նվիրված գրական միջոցառում կազմակերպելու: Սա ոգեւորող պահ է, ազգայինն է կարեոր այստեղ, այն հոգեւոր կարոտը, որ մեր մեջ բացակայում է:Նման միջոցառումների շնորհիվ, կարծում եմ, այդ կարոտը պիտի նորից լիցքավորվի մեր երիտասարդների սրտերում»,-ասաց Լենա Անթառանյանը:
Կարդացեք նաև
Անուշ ԲՈՒԼՂԱԴԱՐՅԱՆ
