ԱԺ Մարդու իրավունքների պաշտպանության եւ հանրային հարցերի մշտական հանձնաժողովի, ԱԺ Եվրոպական ինտեգրման հարցերի մշտական հանձնաժողովի անդամներն այսօր այցելեցին «Նուբարաշեն» քրեակատարողական հիմնարկ՝ ծանոթանալու, թե ինչ պայմաններում են ապրում ազատազրկվածները, ինչ խնդիրներ ունեն:
Aravot.am-ը այցի մանրամասներին տեղեկացավ ԱԺ Մարդու իրավունքների պաշտպանության եւ հանրային հարցերի մշտական հանձնաժողովի փոխնախագահ Մարգարիտ Եսայանի հետ զրույցում: Նա տեղեկացրեց, որ այցի նպատակներից է համապարփակ տեղեկատվություն հավաքել դատապարտյալների պայմանների, նրանց հուզող խնդիրների վերաբերյալ, որոնք կբարձրացվեն նոյեմբերի 20-ին կայանալիք խորհրդարանական լսումների ժամանակ:
Մանրամասնելով` տիկին Եսայանը նշեց. «Այսօրվա այցի ընթացքում Նուբարաշեն քրեակատարողական հիմնարկ երկու հանձնաժողովների անդամներս նպատակ ունեինք կոնկրետ մարդկանց տեսնել: Օրինակ՝ ես ցանկություն ունեի հանդիպել ՀԱԿ ակտիվիստ Տիգրան Առաքելյանին: ԲՀԿ-ի մեր գործընկերները նաև ցանկություն ունեին հանդիպել այն երիտասարդներին, որոնք այս օրերին իրենց բերանը, կոպերն էին կարել, մատը կտրել:
Քրեակատարողական հիմնարկի աշխատողներից ազատազրկվածները որևէ բողոք չունեին, և բոլորը միաձայն նույն բան էին ասում, որ իրենց հանիրավի են դատել, իրենց դատավճիռը արդարացի չէ ու իրենց գործած մեղքերին ոչ համարժեք: Մենք՝ որպես պատգամավորներ, պետք է ամեն ինչ անենք, որ այդ մարդիկ քիչ թե շատ նորմալ մարդկային պայմաններում ապրեն: Բարձրացվեցին և տեսակցության, և տնից ուղարկվող սննդամթերքների հետ կապված խնդիրներ: Կարծում եմ, որ մեր՝ քրեակատարողական հիմնարկների աշխատակիցների և ազատազրկվածների հետ հանդիպումները զգաստության իրավիճակ են ստեղծում և մարդիկ հասկանում են, որ միայնակ չեն ու իրենց շահերը պաշտպանողներ կան»:
Կարդացեք նաև
Մ. Եսայանը նշեց, որ ինքը հատկապես ցանկանում էր հանդիպել Տիգրան Առաքելյանին: Մեր զրուցակիցը մանրամասնեց. «Անձամբ ես ցանկություն ունեի միայն հանդիպել Տիգրան Առաքելյանի հետ: Որոշակի անհանգստություն ունեի, քանի որ այս երիտասարդի հետ մենք հեռակա բանավեճի մեջ էինք մտել: Կարծում եմ, որ ճիշտ էր այս հանդիպումը, ես նրան իմ կազմած ու խմբագրած գիրքն էի նվեր տարել, խնդրեցի, որ ազատ ժամանակ նա ընթերցի: Զրուցեցինք, որոշ հարցեր տվեցի նրան, թեպետ այդ զրույցը լարվածության էլ էր պարունակում: Լարվածություն ոչ թե իմ, այլ Տիգրանի կողմից: Ես խնդրեցի, որ ինքը թողնի տրամադրվածությունը և ինձ ընդունի որպես մի մարդու, որ գնացել է նրա հետ հանդիպման ազնիվ նկատառումներից ելնելով: Տիգրանը գրեթե իմ երեխաների հասակակիցն է, և որևէ թշնամանք, լարվածություն պարզապես անհարմար է, որ լինի մեր միջև: Ինքս հանդիպումը չեմ քաղաքականացնում, դա անձամբ իմ որոշումն է, կուզեի, որ նա էլ չքաղաքականացներ այն: Սակայն նա բացասական էր տրամադրված իմ և Հանրապետական կուսակցության հանդեպ ու միտում է տեսնում իր՝ դատապարտված լինելու մեջ»:
Անդրադառնալով ազատազրկվածների՝ բերանը և կոպերը կարելու խնդրին, Մ. Եսայանը տեղեակացրեց. «Ազատազրկվածների բանտապետն այսօր մեզ ասաց, որ դրանում որևէ արտառոց բան չի տեսնում: Նման դեպքեր միշտ էլ եղել են, ինչպես ՀՀ-ում, այնպես էլ աշխարհի այլ բանտերում: Եվ ազատազրկվածները ոչ թե իրականում բերանները կարում են, այլ տեխնիկական հնարք է, որը իրականացնում են»:
Տաթև ՀԱՐՈՒԹՅՈՒՆՅԱՆ
