Մադրիդի «Ռեալի» հարձակվող Կրիշտիանու Ռոնալդուն որպես Սիլվիո Բեռլուսկոնիի գործով դատավարության վկա նոյեմբերի 5-ին հրավիրվել է դատարան:
Իտալիայի նախկին վարչապետը մեղադրվում է անչափահաս մարմնավաճառուհիների, մասնավորապես, Ռուբի մականունով մարոկկացի պարուհու, ծառայություններից օգտվելու մեջ: Պորտուգալացի ֆուտբոլիստը դատարանին պետք է պատմի իր եւ Ռուբիի հարաբերությունների մասին, որի հետ, ըստ աղջկա, ծանոթացել է Բեռլուսկոնիի տանը: Ռոնալդուից բացի ծանուցում ստացել են հեռուստահաղորդավարուհի եւ դերասան Բելեն Ռոդրիգեսը, լրագրող Կառլո Ռոսելան, պատգամավոր Դանիելա Սանտանկեն:
Բեռլուսկոնին մեղադրվում է նաեւ պաշտոնական դիրքը չարաշահելու մեջ: Երկու տարի առաջ, երբ նա դեռ վարչապետ էր, զանգահարել է Միլանի ոստիկանություն եւ պահանջել գողության կասկածով բաժանմունք բերված Ռուբիին գրավի դիմաց բաց թողնել: Բեռլուսկոնին պնդում է, որ նա աղջկան օգնել է՝ նրան համարելով Եգիպտոսի նախկին լիդեր Հոսնի Մուբարաքի զարմուհին:
Աշոտ ՀԱԿՈԲՅԱՆ
