Թուրքիայի վարչապետ Ռեջեփ Թայիփ Էրդողանն ասել է, որ նորվեգացի մարդասպան Անդրես Բրեյվիկի դատավճիռը շատ մեղմ է նրա համար: Հայտնում է «Հյուրիեթ դեյլի նյուզ» թերթը:
Էրդողանի կարծիքով նրան պետք է մահապատժի դատապարտեին, որպեսզի զոհերի ընտանիքները խաղաղություն գտնեին:
«Ես նրանց հարցրի, ինձ ահավոր հետաքրքրում էր: Ինչպե՞ս կարող է մեկը, որ 77 հոգի է սպանել, դատապարտվել ընդամենը 21 տարվա ազատազրկման: Ինձ պատասխանեցին, որ նա այլևս երբեք դուրս չի գա: 21 տարի անց որևէ հիմնավորում կգտնվի, որ ևս 21 տարի պահեն», – ասել է Էրդողանը ու հարցրել, թե ինչպես ինքը կարող է դրանում համոզված լինել, – «Այո, մահապատիժը հանված է Եվրոպայում, բայց արդյոք հանված է Ամերիկայում, Ճապոնիայում և Չինաստանում: Ուրեմն կա մահապատիժը պահպանելու արդարացված պատճառ»:
Պատրաստեց Հովհաննես ԻՇԽԱՆՅԱՆԸ
