Երեխաներին բանջարեղեն ուտել սովորեցնելու լավագույն տարբերակներից մեկը դրանք ճապոնական ձեւով պատրաստելն է: Այս եղանակով պատրաստված մթերքները կոչվում են «տեմպուրա»: Ճապոնացիները տեմպուրա պատրաստում են ոչ միայն բանջարեղենից, այլեւ` մրգերից, ինչպես նաեւ` ձկնեղենից, ծովամթերքից, հավի մսից եւ այլն: Ինձ հատկապես դուր է եկել ակացիաների ծաղկաբույլից տեմպուրա պատրաստելու ճապոնական գաղափարը: Այս սննդատեսակի էությունն այն է, որ մասնատված մթերքը տապակվում է շատ բարձր ջերմաստիճանում, շատ կարճ ժամանակահատվածում, խմորապատ վիճակում, եւ խմորն այնքան արագ է տապակվում, որ միջի մթերքը մնում է գրեթե հում` չկորցնելով օգտակար հատկությունները:
Պատրաստման եղանակը
Կարդացեք նաև
Բանջարեղենը` սմբուկ, կանաչ եւ կարմիր պղպեղներ, սոխ, ծաղկակաղամբ, բրոկոլի, դդմիկ, սունկ, կանաչ լոբի, լվացեք եւ կտրատեք: Պատրաստեք «կլյարը»` խմորը:
Տեմպուրայի խմորն ունի իր դասական բաղադրությունը` ձու, ջուր եւ ալյուր: Սակայն ես ձեզ կառաջարկեմ մի փոքր այլ տարբերակ` մեկ ձու, մեկ բաժակ գարեջուր կամ հանքային ջուր, ալյուր, տարբեր համեմունքներ` կարմիր աղացած պղպեղ, շաֆրան, չորացած սամիթ, աղ, քունջութ: Միայն թե գարեջուրը շատ մուգ չլինի: Պետք է դառնա թթվասերից մի քիչ թույլ, մածունի խտության խմոր:
Խորը կաթսայի կամ թավայի մեջ բավականաչափ բուսական յուղ տաքացրեք, այնքան, որ բանջարեղենի կտորները ամբողջությամբ ընկղմվեն դրա մեջ: «Ֆրիտյուրի» էֆեկտ է պետք ստանալ:
Մինչ բուսական յուղը տաքանում է, կտրատած բանջարեղենը ընկղմեք խմորի մեջ, եւ հատ-հատ, կամ ծայրահեղ դեպքում մի քանի հատ, լցրեք տաք ձեթի մեջ:
Մեկական րոպե երկու կողմից շատ տաք ձեթի մեջ տապակելուց հետո, հանեք բանջարեղենի կտորները եւ դրեք թղթե սրբիչի վրա, որպեսզի ավելորդ ձեթից ազատվեք: Ապա ավելացրեք մնացած մթերքները, եւ այդպես` այնքան, մինչեւ բոլորը տապակվի:
Նկատի ունեցեք, որ պատրաստման ընթացքում, երբ զգաք, որ թավայի ձեթը պակասել է եւ մթերքներն այլեւս ամբողջությամբ չեն ընկղմվում, ավելացրեք բուսական յուղը միայն այն ժամանակ, երբ թավայի միջից հանել եք եղած բոլոր մթերքները, ոչ մի դեպքում ձեթը չավելացնեք եփվող բանջարեղենների վրա:
Մատուցեք տաք վիճակում, թեեւ սառն էլ համեղ է: Կարող եք առանձին մատուցել նաեւ սոյայի սոուս, որի մեջ թաթախած տեմպուրան ձեզ հաստատ դուր կգա:
Այս նույն «կլյարի» մեջ կարող եք թաթախել մանր կտրատած հավի կրծքամիս, ծովախեցգետին, ձկան ֆիլե (սառեցրած ձկնեղենը ես նախընտրում եմ պատրաստել միայն այս տարբերակով):
Այս եղանակով շատ լավ է ստացվում նաեւ խնձորը, սալորը, անանասը, բանանը, սակայն, բնականաբար, մրգերով պատրաստելու դեպքում «կլյարը» պետք է այլ լինի` առանց գարեջրի եւ աղի: Գարեջուրը կարելի է փոխարինել ջրով կամ կաթով, աղը` շաքարավազով, եւ վերցնել այլ համեմունքներ` աղացած դարչին, մեխակ, վանիլ…
Բարի ախորժակ:
