«Ներկայացումը նվիրված էր բանակի կազմավորման 20-ամյակին, ուզում ենք մեր ներդրումը ունենալ, անել այնքան ինչքան կարող ենք: Եթե ունենանք լավ մշակույթ հնարավորություն կստեղծվի դուրս գալ եւ ներկայանալ ոչ հայ հանդիսատեսին, ուրիշ պետություններում, քանի որ ժողովրդին ճանաչում են իր իսկ մշակույթի միջոցով»,- այսօր լրագրողների հետ հանդիպման ժամանակ նշեց ՀՀ արվեստի վաստակավոր արտիստուհի Լալա Մնացականյանը:
Այս տարի սեպտեմբեր ամսին Կարեն Չապեկի «Մայրը» ներկայացումը մասնակցել է Բրեստի «Բելայա Վեժա» թատերական փառատոնին եւ արժանացել «Հանդիսատեսի համակրանք» մրցանակին:
Արտիստուհու պնդմամբ հայրենասիրությունը դա այն չէ, որ գոռաս ու կուրծքդ ծեծես, պետք է հնարավոր ամեն ինչ անել, որպեսզի կայանա քո երկիրը: Եթե մենք մեր հողը չպաշտպանենք, ուրեմն մենք անցյալ չունենք եւ ապագան վտանգված է:
Կարդացեք նաև
«Փառատոնը միջազգային էր, ներկայացուցիչներ կային Պարսկաստանից, Բելառուսիայից: Մրցում էինք լուրջ թատրոնների հետ, մեր ուսանող-դերասաններին դահլիճը հոտնկայս էր դիմավորում: Չտալ այդ մրցանակը պարզապես հնարավոր չէր, ժողովուրդը դուրս էր գալիս հիացած,իսկ մեր կողմից մեծ համարձակություն էր գնալ նման փառատոնի»:
Դերասանուհին կարծում է, որ բեմում դերասանը զինվոր է՝ կհաղթի հաղթանակած դուրս կգա: Ռիսկի գործոնը մեծ էր, սակայն խաղացել են հոյակապ:
Նոյեմբերի 17-ին՝ Ուսանողության միջազգային օրը, ԵԹԿՊՀ Ուսումնական թատրոնը մեկնարկում է նոր խաղաշրջանը Կարեն Չապեկի «Մայրը» ներկայացմամբ:
Երեւանի թատրոնի եւ կինոյի պետական ինստիտուտի ուսումնական թատրոնի տնօրեն Էրիկ Բարսեղյանը նշեց, որ հատուկ է ընտրվել այս ներկայացումը, քանզի այն հայրենասիրական բնույթ ունի.
«Մենք պլակատային հայրենասիրության կողմնակիցը չենք: Արվեստն ու մշակույթն են բոցավառում հայի մարտական ոգին: Երիտասարդների շրջանում պարտադիր են հայրենասիրական ներկայացումները, փառատոնին մասնակցելով մեր ուսանողները ոչ պակաս գեղեցիկ եւ ինքնատիպ ներկայացան: Յուրաքանչյուր ներկայացում արվում է հանդիսատեսի համար, մրցանակը խոսուն ապացույց է, պարզապես պետք է լռել»:
Ուսումնական թատրոնի տնօրենի համոզմամբ առաջին քայլերը կարծես թե ստացվել են: Նպատակ ունեն ակտիվացնել թատրոնը: Ընտրյալ լինելը առավելություն չէ այլ պարտականություն, իր գործունեւությամբ տնօրենը կապացուցի, որ ուսումնական թատրոնը արժանի է լինելու բոլոր մյուս թատրոնների կողքին:
Անժելա ՇԱՀՈՒՄՅԱՆ
