Պատմաբան Գեւորգ Մելքոնյանը խոսելով ռուս-ադրբեջանական հարաբերությունների սրացումից, նաեւ Ռուսաստանի կողմից Գաբալայի ռադիոլոկացիոն կայանի շահագործման դադարեցումից, կարծիք հայտնեց, որ այսօր Ադրբեջանում ռուս-ադրբեջանական հարաբերությունների սրացման հետ կապված լուրջ խուճապ կա. «Նրանք բարձր պաշտոնյաների մակարդակով անընդհատ հայտարարում են, որ սա չի կարող վնասել իրենց հարաբերություններին, իրենք ցանկանում են այդ լավ հարաբերությունները պահպանել, բայց նման դիրքորոշման արտահայտում չկա Ռուսաստանի կողմից: Բացի այդ՝ բոլորի համար էլ պարզ է, որ ստեղծված իրավիճակը մեծ մասով հարվածելու է ռուս-ադրբեջանական հարաբերություններին. մանավանդ որ, այսօր տարածաշրջանում ի դեմս Իրանի, ինչպես նաեւ Սիրիայում կատարվող իրադարձությունների, որին Ռուսաստանը լուրջ հետեւում է, եւ նման կարեւոր պատմական պահի հրաժարվել թեկուզ եւ թույլ ռադիոլոկացիոն կայանից՝ նշանակում է, որ Ադրբեջանը թիկունքից հարվածում է Ռուսաստանին, հնարավորություն չտալով հարավային սահմանների պաշտպանական գոտին ամրապնդել»:
Մելքոնյանի ձեւակերպմամբ՝ նման պայմաններում ենթադրվում է, որ Հայաստանի դերը տարածաշրջանում Ռուսաստանի համար մի քանի անգամ ավելանալու է. «Ռուս փորձագետներն էլ բազմիցս նշել են, որ հնարավոր է Հայաստանում կառուցվի ռադիոլոկացիոն կայան, ինչից Ադրբեջանում շատ են վախենում, իսկ սա ենթադրում է, որ Հայաստանի անվտանգությունը կավելանա, իսկ դերը տարածաշրջանում, ռազմական առումով կամրապնդվի»:
Պատմաբանը հնարավոր համարեց այն, որ Ադրբեջանը Գաբալայի ռադիոլոկացիոն կայանը տրամադրի Թուրքիային կամ ԱՄՆ-ին, ինչն էլ կբերի նրան, որ Ռուսաստանի ու Ադրբեջանի հարաբերությունները ճգնաժամ կապրեն: Ըստ պատմաբանի՝ «Ադրբեջանը հրաժարվելով Ռուսաստանին հնարավորություն տալ շահագործել այդ կայանը, կենթարկվի Մոսկվայի ու Իրանի ճնշումներին, ինչպես նաեւ տարածաշրջանային մեկուսացման մեջ կհայտնվի: Այսօր արդեն դրա հետեւանքները կան ու այն արտոնությունները, որ ուներ Ադրբեջանը ժամանակին, Ռուսաստանից զինատեսակներ գնելու պարագայում, այսօր կզրկվի դրանից»:
Կարդացեք նաև
Եվա ՀԱԿՈԲՅԱՆ
