Այսօր էթիկայի հանձնաժողովի կազմավորման հարցում ՀՀԿ-ն հայտարարեց, որ իրենք համոզել են ԲՀԿ-ին եւ կարող են գալ կոմպրոմիսի:
Այս առնչությամբ այսօր Aravot.am-ը ՀԱԿ խմբակցության ղեկավար Լեւոն Զուրաբյանից հետաքրքրվեց, թե ինչո՞ւ իրենք չէին մասնակցում Հովիկ Աբրահամյանի հետ քննարկմանը եւ ինչպե՞ս կմեկնաբանի ԲՀԿ-ի համոզվելը: Նա պատասխանեց. «Մեզ համար ակնհայտ է մի բան՝ որ գործող օրենքի համաձայն, կոալիցիոն մեծամասնությունը չունի բացարձակ վերահսկողություն: Այսինքն, հնարավոր են որոշումներ, որոնք նրանց վերահսկողությունից դուրս լինեն: Բոլոր այս փոփոխությունների իմաստը այն է, որ կոալիցիոն մեծամասնությունը ձեռք բերի ըստ էության վետոյի իրավունք, այսինքն՝ վերահսկողություն: Բնականաբար, մենք նման քայլի չենք կարող գնալ, մենք երբեք համաձայնություն չենք տա նման քայլի: Իրենք են մեծամասնությունը, թող սպանեն էթիկայի հանձնաժողովը, եթե տեսնում են, որ դա պրոբլեմ է իրենց համար: Դա իրենց գործն է: Բայց իրենք դրանով ապացուցում են, որ իրենք ժողովրդավարության անգամ ամենափոքրիկ տարրից վախենում են»: Ինչ վերաբերում է ԲՀԿ-ին, որը երեկ դեմ արտահայտվեց, իսկ այսօր կարծես թե հաջողվել է ՀՀԿ-ին նրանց համոզել, Լեւոն Զուրաբյանի մեկնաբանությամբ. «Դա ինձ չի վերաբերում: Ես պատասխանատու եմ Կոնգրեսի դիրքորոշման համար»:
Հռիփսիմե ՋԵԲԵՋՅԱՆ
