“Ա1+”-ի լրագրող Մհեր Արշակյանի եւ Ազգային ժողովի պատգամավոր Մհեր Սեդրակյանի միջեւ տեղի ունեցած միջադեպի առիթով Henaran.am-ի հետ զրույցում ԱԺ փոխնախագահ Էդուարդ Շարմազանովը ափսոսանք է հայտնել: “Ափսոսում եմ միջադեպի կապակցությամբ, որպես ՀՀԿ խոսնակ եւ ԱԺ փոխնախագահ ներողություն եմ հայտնում Մհեր Արշակյանին եւ լրագրողական հանրությանը: Հուսով եմ, որ նման երեւույթներ այլեւս չեն կրկնվի”,-ասաց նա:
Հիշեցնենք, որ այսօր՝ դեկտեմբերի 19-ին Մհեր Սեդրակյանը հրաժարվելով պատասխանել լրագրողի հարցին՝ վիրավորել է նրան: Լրագրողները բաց նամակով դիմել են ԱԺ նախագահ Հովիկ Աբրահամյանին:
Տեղեկացնենք նաեւ, որ պարոն Շարմազանովի ներողություններին միացել է նաեւ մեկ այլ ՀՀԿ-ական` ԿԳ նախարար Արմեն Աշոտյանը, որը Ֆեյսբուքյան իր էջում արել է հետեւյալ գրառումը.«Էդուարդ Շարմազանովը ափսոսանք է հայտնել Մհեր Արշակյանի հետ կապված միջադեպի առիթով և ներողություն խնդրել: Ես նույնպես ցավում եմ կատարվածի կապակցությամբ և միացնում եմ իմ ներողությունները»:
Ի դեպ, իր հերթին Մհեր Սեդրակյանը aysor.am-ին ասել է, որ չի պատրաստվում ներողություն խնդրել լրագրողից:
