ԵՐԵՎԱՆ, 11 Հունվար, 2013 – Այսօր տեղի ունեցավ Հայաստանում՝ փետրվարի 18-ին կայանալիք նախագահական ընտրությունները դիտարկելու նպատակով ժամանած ԵԱՀԿ մարդու իրավունքների և ժողովրդավարական հաստատությունների գրասենյակի (ԺՀՄԻԳ) ընտրությունների դիտորդական առաքելության աշխատանքների մեկնարկման մամլո ասուլիսը:
Առաքելությունը ժամանել է ՀՀ վարչապետի հրավերով:
Առաքելությունը ղեկավարում է դեսպան Հայդի Թալիավինին և բաղկացած է Երևան քաղաքում տեղակայված 13 միջազգային փորձագետներից, ինչպես նաև 24 երկարաժամկետ դիտորդներից, որոնք տեղաբաշխվելու են ողջ երկրով: Ի հավելումն, ԺՀՄԻԳ հրավիրելու է 250 կարճաժամկետ դիտորդներ՝ ընտրությունների օրը, ինչպես նաև արդյունքների հաշվման գործընթացները հետևելու նպատակով:
Դիտորդները գնահատելու են նախագահական ընտրությունների համապատասխանությունը ԵԱՀԿ պարտավորություններին, միջազգային այլ չափանիշներին, ինչպես նաև ազգային օրենսդրությանը: Դիտորդները մանրամասնորեն հետևելու են քարոզարշավի ընթացքին, ընտրական և կառավարության համապատասխան մարմինների աշխատանքին, ուսումնասիրելու են ընտրական օրենսդրությունը, մեդիա միջավայրը և ընտրական վեճերի լուծման ընթացքը:
Կարդացեք նաև
Որպես դիտարկման գործընթացի մի մաս, առաքելությունը հանդիպելու է նախագահական թեկնածուների, համապատասխան իրավասու մարմինների և քաղաքական կուսակցությունների, դատական համակարգի աշխատակիցների, քաղաքացիական հասարակության և լրատվամիջոցների ներկայացուցիչների հետ:
Ընտրության օրը դիտարկելու նպատակով ժամանած կարճաժամկետ դիտորդները ընդգրկվելու են թիմերում՝ կազմելով երկուական դիտորդ յուրաքանչյուր թիմում, և տեղաբաշխվելու են ողջ երկրով՝ տեղամասերի բացման, քվեարկության, քվեաթերթիկների հաշվման և ընտրության արդյունքների ամփոփման գործընթացները հետևելու նպատակով:
Նախնական հանգամանքների և եզրակացությունների վերաբերյալ հայտարարությունը ներկայացվելու է ընտրության հաջորդ օրը:
ԺՀՄԻԳ-ը հրապարակելու է իր վերջնական զեկույցը՝ ընտրական գործընթացների ավարտից երկու ամիս անց:
ԵԱՀԿ/ԺՀՄԻԳ գրասենյակի մամուլի հաղորդագրություն