Այսօր «Ուրբաթ» ակումբում բնապահպանների նախաձեռնող խումբը հայտարարեց Համահայկական բնապահպանական ճակատ ստեղծելու մասին:
«Փաստելով, որ ՀՀ-ում ներկայումս տեղի է ունենում էկոգաղութացում եւ բնական ռեսուրսների անխնա օգտագործում, նկատի ունենալով, որ ՀՀ իշխանությունները բնապահպանական աղետը կանխող քայլեր չեն ձեռնարկում, հաշվի առնելով ժողովրդի այն հատվածին, որը հայտնվել է բնական ռեսուրսները թալանող կապիտալի մեջ եւ ի զորու չէ կանգնեցնել իրավիճակը, անհրաժեշտություն ենք համարում Համահայկական բնապահպանական ճակատ` ՀԲՃ ստեղծելը: Ճակատի նպատակն է` Հայաստանի բնական միջավայրի պահպանությունը, տնտեսական բնականոն զարգացման ապահովումը, բնական ռեսուրսների արդյունավետ օգտագործմանը նպաստելը: ՀԲՃ-ն կգործի բաց հաշվետվության սկզբունքով, կկազմի խորհրդատվական մարմին` բաղկացած հայտնի գիտնականներից եւ հանրային գործիչներից,- ասաց բնապահպան, աշխարհագրագետ Լեւոն Գալստյանը, ապա հավելեց,- Կստեղծվեն նաեւ խմբեր, որոնք կզբաղվեն, օրինակ, փոքր ՀԷԿ-երով, անտառների վերահսկողությամբ, հանքերով, կրթական ծրագրերով: Խմբերից յուրաքանչյուրը կունենա համապատասխան մասնագետ-խորհրդատու»:
Ամերիկահայ բնապահպան Վաչե Թովմասյանն ասաց, որ ներկայացնում է ամերիկահայ բնապահպանների խումբը. «Մենք հետեւում ենք Հայաստանի բնապահպանական խնդիրներին եւ ակտիվիստների աշխատանքին: Երբ առաջին անգամ լսեցինք Թեղուտի եւ Թռչկանի մասին, միջոցառումներ եւ դասախոսություններ ձեռնարկեցինք մեր համայնքներում եւ կապ հաստատեցինք Հայաստանի ակտիվիստների հետ: Կարեւոր է այն հանգամանքը, որ սփյուռքը սրտացավ է Հայաստանի բնապահպանական խնդիրներով եւ պատրաստ է աջակցել»:
Բնապահպան Մարիամ Սուխուդյանը հայտնեց, որ վերջերս եղել է Արցախում, որտեղ շահագործման լիցենզիա է ստացել շուրջ 300 հանք. «Արցախում չկա պայքարող ուժ, որը կկարողանար կանխել ազատագրված տարածքների ավերումը: Հանդիպեցինք տեղի ակտիվիստ-երիտասարդների հետ, ովքեր նույնպես պատրաստ են միանալ ՀԲՃ-ին»:
Կարդացեք նաև
Բնապահպան Եղիա Ներսիսյանի խոսքով. «Ճակատը պատրաստ է ընդունել խնդրով մտահոգվածներին: Մեր պայքարը պետք դուրս գա Երեւանի սահմաններից»:
Լուիզա ՍՈՒՔԻԱՍՅԱՆ
