Երեկ արմավիրցիների հետ հանդիպմանը նախագահի թեկնածու Հրանտ Բագրատյանը ընտրողների հարցին, թե ինչո՞ւ չեք միավորվում Րաֆֆի Հովհաննիսյանի հետ, իր մտահոգությունը հայտնեց, որ չգիտի, թե ով է իրական ընդդիմություն, ով ինչ սկզբունքի համար է պայքարում:
Այսօր նախագահի թեկնածու Րաֆֆի Հովհաննիսյանին Aravot.am-ը խնդրեց մեկնաբանել դա եւ ասել՝ անհրաժեշտություն չի՞ զգում միավորվելու եւ միասնական հանդես գալու: Րաֆֆի Հովհաննիսյանը պատասխանեց. «Քաղաքական կոնսոլիդացիայի հրամայական խաչմերուկը առջեւում է, դա անպայման կլինի: Ես խոսել եմ Պարույր Հայրիկյանի հետ, պարոն վարչապետի հետ, այդ հաղորդակցությունների շարանը կշարունակվի: Բայց անհրաժեշտ է նույնպես, որ քաղաքական տարբեր ուժերը քաղաքացիական հասարակության հետ հասկանան, որ նժարի վրա դրված է մեր երկիրը միանգամյա փոխելու հավանականությունը: Դրա համար հաղորդակցություն կլինի եւ կշարունակվի»:
Ինչ վերաբերում է երեկ Հրանտ Բագրատյանի հետ թեյ խմելուն, նա նշեց, որ մի քանի հանդիպումներ է ունեցել. «Վերջին անգամը երեկ գիշեր է եղել: Քննարկել ենք Հայաստանի ապագան, որ հայ ժողովուրդը մեր միասնական ջանքերով իր հաղթանակը տոնի»:
Լրագրողների հետ զրույցում, մեկնաբանելով Պարույր Հայրիկյանի որոշումը, նա ասաց, որ կապ չունի՝ կհետաձգվի ընտրությւոնները, թե ոչ, ժողովուրդը պատրաստվում է իր հաղթանակին առաջին անգամ 20 տարվա ընթացքում. «Ես ասել եմ Պարույր Հայրիկյանին, որ ամբողջովին ձեր իրավունքն է, եւ ձեր որոշումը ես կհարգեմ»:
Կարդացեք նաև
Հարցին, թե հնարավո՞ր է ինքնակազմակերպված լինի մահափորձը՝ Րաֆֆի Հովհաննիսյանը պատասխանեց, որ նման դավադրային տեսություններին չի հավատում:
Նա վստահ չի, որ կբացահայտվի մահափորձը, որովհետեւ աչքի առաջ կա Հոկտեմբերի 27 եւ Մարտի 1: Հարցին, եթե նախագահ լինեք, կբացահայտե՞ք, նա պատասխանեց, որ նախագահը միանձնյա չի կարող հարցեր լուծել, բայց կունենա անկախ իրավական ինստիտուտ, որը ամեն ինչ կանի, որ բացահայտի այդ դեպքերը:
Հռիփսիմե ՋԵԲԵՋՅԱՆ
