Շիրակի մարզպետարանի անմիջական հարևանությամբ` «Կիլիկիա» բիստրոյի դիմաց, տվյալ օբյեկտի տերը այսօր ծառահատել ու վայր էր գցել 50-60 տարվա բարդին` մասնակիորեն փակելով կենտրոնական փողոցը ու դժվարանցանելի դարձնելով երթևեկությունը: Եվ մինչև բնապահպանական «Բիոսոֆիա» հ/կ-ի նախագահ Գևորգ Պետրոսյանը կահազանգեր մարզի բնապահպանական պետական տեսչությանը, հայտնի դարձավ, որ բարդին ծառահատել են օրինական` Գյումրու քաղաքապետարանի թույլտվությամբ:
Գևորգ Պետրոսյանը մեզ պատմեց, որ այդ շենքի բնակիչները դեռևս նախորդ քաղաքապետին` Վարդան Ղուկասյանին նամակ էին հղել` խնդրելով էտել ծառը, քանի որ ծառի ճյուղերը շատ բարձր են, տերևները լցվում են կտուրները, այնուհետ փակում են ջրհորդանները: Բարդու արմատներն էլ իրենց հերթին անհարմարություններ են ստեղծում շենքի հիմքում: «Ես այսօր հանդիպեցի «Կիլիկիա» բիստրոյի տիրոջ հետ, ով ինձ ցույց տվեց քաղաքապետարանի թույլտվությունը: Նա պատճառաբանեց, որ բարդին անհարմարություններ էր ստեղծում, դրա համար է ծառահատել, նաև ասաց, որ պատրաստ է բարդու փոխարեն ցանկացած այլ ծառ տնկել, նույնիսկ շատ թանկարժեք, միայն թող ասեն ինչ ծառ է անհրաժեշտ:
Օբյեկտի տերը ծառահատումն իրականացրել է իր անձնական միջոցներով: Հասկանալի է, որ քաղաքապետարանը թույլ է տվել, սակայն նրանք սկսել են աշխատել նույն մեթոդներով, ինչ նախորդները: Նախ այդ ծառը միանշանակ պետք էր էտել, եթե այդպես լինի Գյումրիում էտման ենթակա ցանկացած ծառ պետք է կտրեն: Եթե քաղաքապետարանը ծառահատման թույլտվություն էր տվել, ապա պետք է բարի լիներ տեղյակ պահել ոստիկանությանը: Իսկ տվյալ դեպքում ոստիկանությունը, տեսնելով, որ պարալիզացվում է փողոցի երթևեկությունը, եկել և հետաքրքվել է, թե ինչ է կատարվում:
Մյուս կարևոր քայլը, որ պիտի անեին հետևյալն է. քանի որ համայնքապատկան տարածք է, պետք է իրենք նախաձեռնեին ծառահատումը, տանեին պահեստավորեին փայտը, որպեսզի վաղը մյուս օր կարողանային վառելիք չունեցող, սոցիալապես անապահովներին տրամադրել: Փաստորեն դա էլ չեն արել:
Կարդացեք նաև
3-րդ կարևոր հանգամանքն այն է, որ ծառահատման թույլտվություն տալու դեպքում ցանկալի է հարցը դնել քննարկման, վերջիվերջո կենսամիջավայր է փոխվում, միգուցե շենքի բնակիչների մեծ մասը իրենց ստորագրությամբ չէին համաձայնի ծառահատման: Այսինքն քաղաքապետարանը մինիմում օրինական քայլերը չի պահպանել: Չեմ ասում մեծ հանցագործություն են արել, բայց օրենք պահպանելու, հասարակական կարծիքի հետ հաշվի նստելու հարցում առաջընթաց չունենք, դա փաստ է»,- Aravot.am –ին իր մտահոգությունները փոխանցեց «Բիոսոֆիա» հ-/կ նախագահ Գևորգ Պետրոսյանը:
Նունե ԱՐԵՎՇԱՏՅԱՆ
Լուսանկարները՝ Արսեն Վարդանյանի
