Կեսօրին Գյումրու քաղաքապետարանն իր ֆեյսբուքյան պաշտոնական էջում տեղադրեց հայտարարություն, համաձայն որի՝ հունիսի 19-ի կարկտահարությունից տուժած քաղաքացիները վնասի փոխհատուցման դիմումներ կարող են ներկայացնել մինչև հունիսի 26-ը։
«Հունիսի 19-ին Գյումրիում տեղացած ուժեղ կարկուտը հերթական անգամ զգալի վնասներ է հասցրել քաղաքին և բնակիչներին։ Տեղումների հետևանքով տուժել են քաղաքացիների սեփականություն հանդիսացող գույքը, տրանսպորտային միջոցներն ու տնամերձ հողատարածքները։
Գյումրու քաղաքապետարանից հայտնում են, որ քաղաքային իշխանություններն արդեն սկսել են կարկտահարության հետևանքով պատճառված վնասների արձանագրման գործընթացը»,- գրված է հայտարարության տեքստում։
Հայտարարությունից կես ժամ անց քաղաքապետարանում այս պատկերն է (տես՝ լուսանկարներում)։
Կարդացեք նաև
Գյումրու փոխքաղաքապետ Գագիկ Մանուկյանն Aravot.am-ին տեղեկացրեց, որ այսօր արդեն 500 քաղաքացի դիմում է ներկայացրել, իսկ հունիսի 10-ի լույս 11-ի գիշերը տեղացած կարկտահարությունից 170 քաղաքացի է դիմում ներկայացրել։
Հիշեցնենք, որ հունիսի 11-ին տեղացած կարկուտից ավերվել էին մարդկանց առանձնատներ, սպասարկման օբյեկտներ, իսկ վերջին կարկտահարությունից հիմնականում տուժել են ավտոմեքենաների վարորդները․ ձվի մեծությամբ կարկուտը ջարդուփշուր էր արել ավտոմեքենաները՝ մեծ վնասներ պատճառելով քաղաքացիներին:
Մեր հարցին՝ ինչպե՞ս է կատարվելու փոխհատուցումը, Գյումրու քաղաքային իշխանությունը քաղաքային բյուջեի սուղ հնարավորություններով ի վիճակի կլինի՞ օգնել տուժած քաղաքացիներին, Գագիկ Մանուկյանը փոխանցեց, որ քաղաքապետարանն արձանագրման գործընթացն է իրականացնում, փաթեթներն ու լուսանկարները փոխանցելու են Շիրակի մարզպետարան, որտեղ կազմված հանձնաժողովները գնահատում են կատարելու ու ուղարկելու են կառավարություն։
Գյումրու քաղաքապետարանի պաշտոնական հայտարարության մեջ նշված է․ «Քաղաքապետարանը հորդորում է բնակիչներին գործել հնարավորինս սեղմ ժամկետներում, որպեսզի հանձնաժողովները կարողանան ժամանակին իրականացնել տեղազննությունն ու գնահատել հասցված վնասի իրական չափը՝ հետագա աջակցության ծրագրերում դրանք ներառելու նպատակով»։
Նունե ԱՐԵՎՇԱՏՅԱՆ
