ԵԳՄ նախագահը` գրական դաշտի խնդիրների մասին
Այսօր «Փաստարկ» մամուլի ակումբում Երևանի գրողների միության նախագահ Աբգար Ափինյանը խոսեց գրական դաշտում առկա խնդիրներից` ասելով, որ գրողները դժգոհ են մրցանակաբաշխություններից, պետպատվերով հրատարակվող գրքերի ընտրությունից, ինչը, ըստ նրանց, սխալ է կատարվում:
Ափինյանը կարծում է, որ գրահրատարակչական ոլորտը թերի է եւ պետք է լուրջ փոփոխությունների ենթարկվի:
ԵԳՄ նախագահի դիտարկմամբ` մշակութային կառույցները պետք է ղեկավարեն իրազեկ մարդիկ. «Այսօր պատահական մարդիկ կան, որոնք չգիտեն, թե ինչպես պետք է կառավարել գրական պրոցեսը: Համակարգն աղետալիորեն թերի է»:
Կարդացեք նաև
Պարոն Ափինյանը միաժամանակ փաստեց, որ ընթերցողը չի հեռացել գրքից եւ ընթերցանությունից. «Ստեղծվել են գրքասերների ակումբներ, որոնք կրում են մեր գրողների անունները: Երիտասարդներն ընթերցում են եւ ուսումնասիրում»:
Աբգար Ափինյանի համոզմամբ. «Պետք է վերականգնել գրքի խմբագրման դասական վիճակը. նախկինում գիրքը գրախոսվում էր, իսկ գրքի լույս տեսնելը տարիներ էր տեւում, բայց արդյունավետ էր: Այսօր գրքերն առանց սրբագրելու եւ խմբագրելու են հրատարակում, ընթերցողն էլ հիասթափվում է: Բացի այդ, մինչ գրախանութ անցնելը գրքի մասին հիշատակվում էր հրատարակության թեմատիկ պլանում: Տպագրությունից հետո կազմակերպվում էին հանդիպումներ հեղինակի հետ, քննարկումներից հետո էլ որոշվում էր` ներկայացնե՞լ գիրքը մրցանակի, թե` ոչ: Գրքի վերջնական հանգրվանը գնահատականն է, որը կարող է լինել մրցանակի ձեւով, բայց թանաքը չչորացած` մրցանակ են տալիս: Այսօր ընթերցողն անգամ դեմքով չի ճանաչում իր գրողներին»:
Լուիզա ՍՈՒՔԻԱՍՅԱՆ
