«Հարավային Կովկասում կինովավերագրության աջակցության CAUCADOC» նախագծի շրջանակներում այսօր «Իմպերիում պլազայում» կազմակերպված «Կինո եւ մեդիա» կլոր սեղան-քննարկման ժամանակ Skype միացման միջոցով Wilton Films ընկերության պրոդյուսեր Տանյա Ռախմանովան իր օրինակով պատմեց, թե ինչպես են կարգավորվում կինո եւ մեդիա հարաբերությունները Անգլիայում եւ Ֆրանսիայում:
Նա բազմաթիվ ֆիլմերի հեղինակ է, որոնցից շատերը միջազգային մրցանակների են արժանացել: Տանյա Ռախմանովան ֆիլմեր է նկարում BBC-ի համար, աշխատում անգլիական եւ ֆրանսիական հեռուստաալիքների հետ: Նրա ձեւակերպմամբ, կինո եւ մեդիա համագործակցությունը մի քանի ձեւաչափով է.
ա) TV-ն անմիջական մասնակցություն է ունենում ֆիլմի արտադրության մեջ,
բ) ազդում է արտադրանքի բովանդակության վրա,
Կարդացեք նաև
գ) TV-ն մեծ գումար ներդնելու դեպքում՝ ավելի շատ իրավունքների է հավակնում:
«Անգլիայում եւ Ֆրանսիայում վավերագրական ֆիլմերն ուղղակի այցեքարտ են, դրանց միջոցով երեւում է հեռուստաալիքի խմբագրական քաղաքականությունը եւ ձեռագիրը:
Ինչ վերաբերում է Ֆրանսիային, այստեղ ավելի արդյունավետ է գումար ներդնել վավերագրական ֆիլմի, քան հեռուստահաղորդման մեջ: Որովհետեւ հաղորդումը կարող է ցուցադրվել մեկ-երկու անգամ, իսկ ֆիլմը բազմիցս, էլ չենք խոսում ֆիլմի վաճառքի եւ մնացած բաների մասին»,-փաստեց տիկին Ռախմանովան:
Անդրադառնալով BBC-ին, նա ասաց, որ այն շատ է վավերագրական ֆիլմեր ցուցադրում, եւ ընդհանրապես BBC-ում շեշտադրումը վավերագրության վրա է: Նրա ձեւակերպմամբ, բրիտանացիները նախընտրում են իրադարձային, տեղեկատվական վավերագրական ֆիլմեր, որոնք հրամցնում են զանազան ձեւաչափերով՝ կախված լսարանից: «Այնպես որ, դոկումենտալիստիկան այստեղ չի մեռնում, ուղղակի մատուցման ձեւերն ու ժանրերն են փոփոխվում»,- ասաց Տանյա Ռախմանովան:
Նրա փաստմամբ, Ֆրանսիայում շատ են արտադրվում նաեւ վավերագրական ֆիլմեր, որոնք հեռուստատեսության ձեւաչափին հարմար չեն, բայց օրենքով այնպես է կարգավորված, որ դրանք էլ պարտադիր ցուցադրվում են կինոթատրոններում:
Գոհար ՀԱԿՈԲՅԱՆ
