Երեւանի ավագանու ընտրությունների ողջ քարոզարշավի ընթացքում ՀԱԿ խմբակցության ղեկավար, ՀԱԿ կուսակցության փոխնախագահ Լեւոն Զուրաբյանը հայտարարում էր. «Մենք ոչ մեկին չենք քննադատելու, բացի իշխանությունից»:
Ահա երեկ հանրահավաքում նաեւ ՀԱԿ նախագահ Լեւոն Տեր-Պետրոսյանն ազդարարեց. «Հայ Ազգային Կոնգրեսը միակողմանիորեն, առանց նախապայմանների, իր համար սահմանել է քարոզարշավային հետեւյալ կանոնները.
– Քննադատության միակ թիրախ դարձնել իշխանական կոալիցիան ներկայացնող Հանրապետական եւ Օրինաց երկիր կուսակցություններին.
– Հակաքարոզչությամբ չզբաղվել ընդդիմադիր կուսակցությունների նկատմամբ, նույնիսկ այն պարագայում, երբ նրանցից որեւէ մեկը չի հարգի այս կանոնները.
Կարդացեք նաև
– Չանել որեւէ քայլ, որը կխանգարի ընտրություններից հետո ավագանու կազմում ընդդիմադիր դաշինքի ձեւավորմանը»:
Մինչդեռ այս ողջ ընթացքում ոչ միայն ՀԱԿ-ին հարող լրատվամիջոցները, այլ նաեւ ՀԱԿ անդամները սոցիալական ցանցերում (դրանք նույնպես հանրային տարածք են, եւ սոցիալական ցանցերում գրառումները շատ հաճախ հայտնվում են ԶԼՄ-ներում) ամենաուժգին քննադատության են ենթարկում մասնավորապես «Ժառանգություն» կուսակցությանը՝ համեմելով անգամ անձնական վիրավորանքներով:
Ընդամենը մի քանի օրինակ մեջբերենք: ՀԱԿ անդամ (մինչ ՀՀՇ-ի՝ ՀԱԿ-ի անվանափոխվելը, նա ՀՀՇ Երիտասարդական միության գործադիր խորհրդի անդամ էր) Բաբկեն Ուռուտյանը Երեւանի քաղաքապետի «Ժառանգության» թեկնածու Արմեն Մարտիրոսյանի՝ «Ռեվոլյուցիա» հաղորդաշարին տված հարցազրույցից հետո ՖԲ-ում մասնավորապես գրել էր. «Արմենչիկ, այ ոջիլ, Սաթիկը մեղավոր չէ, որ դու քեզ փչացրեցիր: Գրեթե նույն հարցերը հնչեցին Վահագն Խաչատրյանի ժամանակ, բայց հստակ երևաց, որ քո մեջ խոսեց ԱԲԻԺՆԻԿԸ»:
Մի քանի մեջբերումներ անենք նաեւ ՀԱԿ ավագանու ցուցակում 16-րդ համար Կարեն Թովմասյանի ՖԲ-յան գրառումներից: «Հրապարակում եմ, բայց արդեն զզվանքս գալիս ա ես բարբաջող դիակից։ Դիակին պետք է թաղել: Արդեն նեխում ա»,- գրել էր նա՝ մասնակցելով Րաֆֆի Հովհաննիսյանի Ազատության հրապարակում հրավիրած հանրահավաքին: Նրա եւ այս եւ հետեւյալ գրառումը հրապարակվել էր նաեւ կայքերում. «Պարզվում ա իրավադեր դիակը ինչ որ քայլեր ա կատարում ու այդ քայլերին որոշել է միանալ Հովհաննես Իգիթյանը։ Կներեք բայց ես 6 տարվա պայքարի ընթացքում Հովհաննես Իգիթյանին կոնֆերանս դահլիճներից ու ֆուրշետներից դուրս երևի չեմ տեսել, մտածում եմ բահանջադերը էտ ինչ քայլեր ա անում, որ Իգիթյանն էլ միանում ա դրանց»:
ՀԱԿ փոխնախագահ Լեւոն Զուրաբյանից այս առնչությամբ հետաքրքրվեցինք՝ մի՞թե ՀԱԿ քարոզարշավային կանոնները պարտադիր չեն կուսակցության անդամների համար: «Մենք ոչ նացիստական, ոչ էլ բոլշեւիկյան տիպի կուսակցություն ենք, որ գրաքննություն մտցնենք ու վերահսկենք մեր կուսակցության անդամների վարքը եւ խոսքերը սոցիալական ցանցերում, փողոցներում, մասնավոր զրույցներում եւ որեւէ այլ տեղ,- պատասխանեց Լեւոն Զուրաբյանը՝ իշխանությունից բացի որեւէ մեկին չքննադատելու իրենց հայտարարության եւ ընդդիմադիր ուժի հասցեին նման հակաքարոզչության հակասությունը բացատրելով այսպես:- Ես խոսում եմ մեր պաշտոնական դիրքորոշման մասին: Կուսակցության լիդերները, մեր քաղաքական ուժի անունից հանդես գալու լիազորված որեւէ քաղաքական գործիչ կամ ներկայացուցիչ նման բանով չի զբաղվում»:
Աննա ԻՍՐԱՅԵԼՅԱՆ
Ֆուրշետների մեծ մասնագետա էդ երիտասարդը, որովայնը երևի դրանով լցնում ու կուշտ երջանիկ աղտոտում բայց չգիտես ինչու սրա նրա վրա շպրտելով
Ինչու ՀԱԿ–ի որոշ անդամները անտեսում են ԲԱՐՈՅԱԿԱՆ կանոնները…
Ավագանու ՀԱԿ ցուցակի անդամը զզվելով դիակից և հեգնելով արևմտահայերեն արտահայտությունները, չի էլ կասկածում, որ գարշահոտության ակունքը կարող է հանկարծ իր մեջ լինել: Թող նա հիշի հետևյալ ասացվածքը. “Կկվի վրայից հոտ է գալիս, գիտի, թե բնից է”: Իհարկե, լինում է, որ գործիչները ինչ-որ ժամանակ անց հեղինակազրկվելով քաղաքական դիակ են դառնում. բայց ավելի հաճախ է պատահում, երբ դիակի կարգավիճակով մտնում են քաղաքականություն և աջ ու ձախ զզվանք արտահայտում: