«Այո, կոռեկտությունը պարտադիր է, բայց եթե նայում ենք, թե ինչ է կատարվում այլ երկրների խորհրդարաններում, այն, ինչը տեղի ունեցավ մեզ մոտ, ինչպես կասեր մեր ընդդիմադիր գործընկերներից մեկը՝ քաղաքական շուլուխ էր»,- «Առավոտի» հետ զրույցում ասաց ՀՀ ԱԺ փոխխոսնակ Էդուարդ Շարմազանովը` պատասխանելով հարցին՝ չե՞ք կարծում, որ էթիկայի որոշակի ներքին նորմեր պետք է սահմանվեն, քանի որ անցած քառօրյայում պատգամավորներն անցան կոռեկտության բոլոր սահմանները: «Հանուն արդարության պետք է ասեմ, որ էթիկայի եւ կոռեկտության սահմաններն առաջինն անցան մեր ընդդիմադիր գործընկերները: Մեր որոշ գործընկերներ էլ ընդամենը, այսպես ասած, հակահարված տվեցին: Ես չեմ արդարացնում դա, բայց դե, մարդիկ զգացմունքային են: Ինձ թվում է՝ կարեւորն այն է, որ ընդդիմության եւ իշխանության միջեւ ատելություն չլինի: Բոլորս էլ նույն երկրի քաղաքացիներ ենք, բոլորս էլ ցանկանում ենք, որ մեր ընտանիքն ու ընկերներն ապրեն արժանապատիվ երկրում»:
«Առավոտ» օրաթերթ
