Մայիսի 25-ին Վրաստանի Մառնեուլիի շրջանի Թեքալի գյուղում կայացավ «Խաղաղասիրական պրակտիկայում հումանիզմի միմիկրիան» թեմայով հասարակական լսում: Այն կազմակերպվել էր «Ժողովրդավարության աջակցության ազգային հիմնադրամի» (NED) աջակցությամբ: Հասարակական լսմանը մասնակցում էին Ադրբեջանի Գյանջա քաղաքից ուսանողներ, Վրաստանից լրագրողներ եւ հասարակական գործիչներ, Տավուշի մարզի սահմանամերձ Նոյեմբերյան քաղաքի մի խումբ բնակիչներ: Զեկուցումով հանդես եկան ադրբեջանցի պրոֆեսոր Նիյազի Մեհտին, գրող, «Քիրվա» պատմվածքի հեղինակ Լեւոն Ջավախյանը, «Մշակութային փոխկապերի Կովկասյան տան» տնօրեն Գեորգի Կանաշվիլին:
Նիյազի Մեհտին ասաց, որ ինքը մասնակցել է խաղաղարար շատ հանդիպումների, Ուպսուլայում հանդիպման ժամանակ հայ մասնակիցները ասել են, որ պետք է ելնել առկա իրողությունից, որ Լեռնային Ղարաբաղն անկախ է, Լեռնային Ղարաբաղի մի ներկայացուցիչ էլ հայտարարել է՝ Ղարաբաղի բանակն այնքան ուժեղ է, որ կարող է հասնել մինչեւ Ստամբուլ: Մեհտին ասաց, որ ինքը Ղարաբաղի մասին հոդված է գրել «Անոմալ ինքնավարություն» վերնագրով, որը չնայած ադրբեջանցիների համար անսովոր է եղել, սակայն այն նորմալ են ընդունել: Այդ հոդվածում ադրբեջանցի պրոֆեսորն առաջարկել է, որ եթե Լեռնային Ղարաբաղը ցանկանում է ունենալ բանակ, թող ունենա, սակայն դա ըստ էության կլինի ոստիկանական կազմավորում: Ըստ Նիյազի Մեհտիի՝ այդ մոդելը պայմանական է, անպայման չէ, որ իրականանա, այն կարող է ընդլայնել իրականության ըմբռնման սահմաննեըը:
Ադրբեջանցի զեկուցողն ասաց, որ խաղաղարար հանդիպումների ժամանակ հայկական կողմը ապավինում է խնդրի հումանիստական կողմին՝ «բավական է իրար սպանել», «մենք բոլորս մարդ ենք» եւ այլն, իսկ ադրբեջանական կողմն այնքան էլ ակտիվ չի աջակցում այդ գաղափարին: Ն. Մեհտին հայտարարեց. «Մի անգամ Լեյլա Ալիեւան մի հայի ասել է՝ «եթե մեր բանակը լիներ Դիլիջանի մոտ, ապա մենք այլ կերպ կխոսեինք, ձեզ կհրավիրեինք Ադրբեջան»: Հումանիզմի միմիկրիան սկսել է մեզ խանգարել: Խաղարար հանդիպումների ժամանակ հայերի կողմից ասված հումանիստական խոսքերն անիմաստը կլինեն, եթե այդ ասվածից հետո հայկական կողմը չասի՝ ինչո՞ւմն է տեսնում հարցի լուծումը: Առանց դրա կլինի հումանիզմի միմիկրիա»:
Կարդացեք նաև
Ոսկան ՍԱՐԳՍՅԱՆ
