Նրանց սպառնում է 4-8 տարի ազատազրկում
Լոռու մարզի Մեղվահովիտ գյուղի բնակիչներ, 1988թ. ծնված Ռադիկ Ծատուրովին եւ նրա կնոջը՝ 1991թ. ծնված Անի Սարգսյանին մեղադրանք է առաջադրվել այն բանի համար, որ ամուսիններով նախնական համաձայնության գալով, տեղյակ լինելով, որ համագյուղացի Կարինե Էմինյանը եւ նրա ընտանիքի անդամները բացակայում են տնից, 2013թ. հունվարի 13-ին, ժամը 20-անց 30-ից մինչեւ ժամը 21-ն ընկած ժամանակահատվածում օգտվելով Կարինե Էմինյանի տան լուսամուտի ապակին ջարդված եւ փեղկը բաց լինելու հանգամանքից՝ ապօրինի մուտք են գործել այդ տուն եւ այնտեղից գողացել 4 կգ նարինջ, 4 կգ նուռ, 8 կգ մանդարին, 7 կգ խնձոր եւ այլ սննդամթերք՝ ընդհանուր 66 հազար 925 դրամ արժողությամբ: Ռադիկ Ծատուրովը նախկինում մեկ անգամ դատված է: Նրա եւ Անի Սարգսյանի նկատմամբ որպես խափանման միջոց է ընտրվել չհեռանալու մասին ստորագրությունը: Նրանց երկուսին էլ մեղադրանք է առաջադրվել ՀՀ քրեական օրենսգրքի 177 հոդվածի 3-րդ մասի 1.1 կետով («Գողությունը, որ կատարվել է բնակարան ապօրինի մուտք գործելով»): Սույն հոդվածը նախատեսում է 4-8 տարի ազատազրկում՝ գույքի բռնագրավմամբ կամ առանց դրա: Այս քրեական գործով հերթական դատական նիստը Լոռու մարզի առաջին ատյանի դատարանում նշանակված է այսօր` հունիսի 6-ին:
Ոսկան ՍԱՐԳՍՅԱՆ
