Ռեջեփ Թայիփ Էրդողանը որոշակի փոփոխություն է մտցրել Գեզիի այգու հարցում
«Տեղին չէ ասել, թե Գեզիի այգում տեղի ունեցած բնապահպանական ակցիան է հիմնական իրարանցումների պատճառը, պարզապես այն խթան հանդիսացավ, որպեսզի բնակչությունն իր բողոքը հայտնի Էրդողանի դեմ»,-ասաց թուքագետ Անդրանիկ Իսպիրյանը «Հենարան» մամուլի ակումբում:
Թուրքիայի հասարակության մոտ 70 տոկոսից ավելին դեմ է նախագահ Ռեջեփ Թայիփ Էրդողանի քաղաքականությանը, ինչպես նաեւ երկիրը դեպի իսլամ տանող գործողություններին, կրոնական դպրոցների բացման ու աշխարհիկ օրենքների փոխարինմանը կրոնականի:
Ըստ բանախոսի, ակցիային փորձել են մասնակցել տարբեր քաղաքական ուժեր` թե քեմալականները, թե ազգայնականները, սակայն վերջիններս հրաժարվել են մասնակցել` չեղյալ համարելով իրենց հայտարարությունը:
Կարդացեք նաև
Թուրքագետի խոսքով, շարժումը փոքր ինչ հանդարտվել է, որն էլ գուցե արդյունքն է նրա, որ Ռեջեփ Թայիփ Էրդողանը որոշակի փոփոխություն է մտցրել Գեզիի այգու հարցում: «Երեկ Ռեջեփ Թայիփ Էրդողանը հայտնեց, որ ծառերի մի մասը մնալու է, չնայած որ նախկինում նախատեսել էին այգին վերածել առեւտրային կենտրոնի, կառուցել հրետանային զորանոց եւ հյուրանոց»,- ասաց Անդրանիկ Իսպիրյանը:
Նրա խոսքերով Թուրքիայում տեղի ունեցած շարժման կիզակետում են եղել նաեւ երեք խոշոր ֆուտբոլային ֆան-ակումբներ, որոնցից առավել ակտիվը եղել է Բեշիքթաշի «Չաշ» ակումբը, որի ղեկավարն է հայազգի Ալեն Մարգարյանը: «Նոր Զարթոնք» հայկական շարժումն է մասնակցել իրականացված գործողություններին: Թուրքագետը հույս է հայտնում, որ հայերը թիրախ չեն դառնա եւ սխալ է համարում բողոքին հայկական պաստառ տալը:
Անդրանիկ Իսպիրյանը հայտնեց նաեւ, որ ԱՄՆ եւ Եվրոպան չեն հանդուրժի սուլթանի առկայությունը, չնայած նրան, որ տարածաշրջանի հետ կապված բավականին մեծ շահ ունեն, Արեւմուտքը նույնպես հանդես եկավ ընդդիմադիր հայացքներով. «Մարրոկոյի թագավորը հրաժարվեց ընդունել Էրդողանին, Թունիսում ընդդիմության ներկայացուցիչները բաց հայտարարեցին, որ հրաժարվում են բռնապետի հետ նստել ընթրիքի»:
Ռուբինա ՍԱՖԱՐՅԱՆ
