Ինչպես տեղեկացրել ենք, գեշերը՝ ժամը 01.30-ի սահմաններում, ԱԺ ԲՀԿ-ական պատգամավոր Մարտուն Գրիգորյանի հորեղբոր տղայի`Արկադիի ընտանեկան վարորդը` 53-ամյա Ալբերտ Մովսիսյանը, «Մերսեդես» մակնիշի 42QQ 444 պետհամարանիշի ավտոմեքենայով բախվել էր Գյումրու կենտրոնական շուկայում գտնվող տաղավարներին` դրանք ավերակ դարձնելով: Վարորդը բարեբախտաբար մարմնական վնասվածքներ չէր ստացել: Գյումրու նորաբաց բժշկական կենտրոնի փոխտնօրեն Արմեն Խաչատրյանը մեզ տեղեկացրեց, որ նույնիսկ հիվանդանոց չի դիմել: Ըստ Գագիկ Շամշյանի, Գյումրիում շրջանառվում է վարկած այն մասին, որ «Ջիփ» մակնիշի մեքենան է ընկել «Մերսեդես» մակնիշի մեքենայի հետևից, նույնիսկ կրակոցներ են հնչել, որի պատճառով էլ Ալբերտ Մովսիսյանը բախվել է տաղավարներին:
Մենք եղանք դեպքի վայրում, որտեղ, իրոք, ավերակ էին դարձել 3 տաղավարներ: Շուկայի առևտրականները մեզ ասացին, որ կրակոցներից տեղյակ չեն, սակայն լսել են, որ «Մերսեդես» մակնիշի մեքենայի մեջ եղել են 5 հոգի, 5-ն էլ` հարբած: «Լավ է, մարդ չի մեռել, ինչ եղել, ժեշտին է եղել, բայց տաղավարների տերերը իրոք մեղք էին, կոշիկի տաղավարն է վնասվել: Դուխի ու կասետ ծախողն էլ շատ մեղք եղավ, առավոտից երկու անչափահաս երեխաների հետ առևտուր է անում, սաղ ապրանքը ջարդուփշուր է եղել: Նյութական վնասներից հստակ խոսել հնարավոր չէ, դեռ հաշվարկում են, երևի փոխհատուցում ստանան. առավոտ շուտ էստեղ էին քննիչներն ու ԱՊՊԱ-ի աշխատակիցները: Այս մարդիկ շատ տուժեցին, օրերով առևտուր չեն անելու, դա դաժան բան է, հարկայինը հաստատ կխեղդի`առանց դրության մեջ մտնելու, չհաշված՝ ինչո՞ վ ապրեն, օրվա հաց են վաստակում, հո՞ միլիոններ չեն աշխատում: Իմ տաղավարը քիչ է վնասվել, բայց էս մարդկանց վիճակը իրոք ողբալի է: Հեչ չգիտենք՝ ո՞ վ են եղել, որտեղի՞ց են եկել», – մեզ հետ զրույցում ասաց թեթևակի վնասված՝ կոշիկի տաղավարներից մեկի տերը: Օծանելիք ու ձայնասկավառակ վաճառողի եղբայրն էլ խուսափեց ինչ-որ բան ասելուց` նշելով, որ ավելի ճիշտ կանի այս մասին քույրը խոսի, ով այդ պահին Լոռիում էր:
Լրագրողական մեր աշխատանքը դեռ չէինք ավարտել, երբ մի կին տեղի առևտրականներին զայրացած ու բարձր ձայնով հարցնում էր` էդ մարդը հրաժարվե՞ց հա, որ ինքն է արել: Նշենք, որ Շիրակի մարզի քննչական բաժնում դեռ քրեական գործ հարուցված չէ, Շիրակի մարզի ոստիկանապետ Կարեն Բաբախեկյանն էլ պարզաբանել էր, որ կրակոցներ չեն հնչել, այլ մեքենան սլացել է բարձր արագությամբ և բախվել տաղավարներին: Տարօրինակն այն է, որ «Մերսեդես» մակնիշի մեքենան պատկանում է ԱԺ պատգամավորի հորեղբոր որդի Արկադի Գրիգորյանի աներոջը` Գյումրու «Նիվեա»-ի կոսմետիկայի խանութի տիրոջը՝ 60-ամյա Խաչատուր Թումասյանին: Անհայտ է մնում, թե գիշերվա ժամին ինչո՞ւ է մեքենան հայտնվել այդ տան փեսայի վարորդի ձեռքում, կամ վարորդը, ով միշտ հաշվետու է Մարտուն Գրիգորյանի հորեղբոր որդուն` իր վարած մեքենայի անվտանգության համար, կարո՞ղ էր, արդյոք, այդքան անպատասխանատու լինել. հարբելով կորցնել գիտակցությունն ու վտանգելով իր ու մյուս ուղևորների անվտանգությունը, բարձրանար մայթի վրա ու քարուքանդ աներ տաղավարները: Այս հարցերի պատասխաններին կանդրադառնանք նոր մանրամասներ ճշտելուն պես:
Նունե ԱՐԵՎՇԱՏՅԱՆ
Հիմա տրամաբանական հարց է առաջանում. ի՞նչ տարբերություն Ադրբեջանի կործանարար քաղաքականության և օլիգարխիայի կործանարար գործունեության միջև….
https://vemard.com/2013-05-02-02-57-38/item/2822-2013-07-06-16-04-28
https://m.facebook.com/groups/122582681136156?refid=12