Կենտրոն եւ Նորք-Մարաշ վարչական շրջանների ընդհանուր իրավասության դատարանում Մխիթար Պապոյանի նախագահությամբ շարունակվեց Արտուշ Հակոբյանի, Քյարամ Ամոյանի, Արման Դալլաքյանի, Արթուր Մանուկյանի, Սամվել Դավթյանի, Դավիթ Գալստյանի եւ մյուսների նկատմամբ հարուցված քրգործի դատաքննությունը: Նախագահողը տեղեկացրեց, որ հոգեբուժարանից հեռախոսով ստացվել է տեղեկություն այն մասին, թե ավարտվել է դատահոգեբանական փորձաքննությունը, եւ եզրակացությունն ուղարկվել է դատարան: Սակայն, ըստ նախագահող դատավորի, եզրակացությունը դատարանը դեռ չէր ստացել: Դատարանը հրապարակեց դեպքի վայրի զննության արձանագրությունը, որը անընթեռնելի լինելու պատճառով քննիչը ներկայացրել էր էլեկտրոնային շարվածքով: Այդ ընթացքում ամբաստանյալ Քյարամ Ամոյանը գլուխը կախ վիճակում էր եւ դատավորի այն հարցին, թե ինչպիսին է ինքնազգացողությունը, ամբաստանյալը պատասխանեց, որ վատ է զգում: Դատարան է հրավիրվել շտապօգնություն, հայտարարվել է ընդմիջում:
Հիշեցնենք, որ ամբաստանյալները մեղադրվում են պաշտոնատար անձանց, տեղական ինքնակառավարման մարմինների ներկայացուցիչների առանձնատներից զինված, դիմակներով առանձնապես խոշոր չափի գողություններ, հափշտակություններ կատարելու համար: Ըստ մեղադրանքը պաշտպանող դատախազի՝ շեշտվում է «Լինսի» հիմնադրամի ԾԻԳ-ի պատասխանատու Էդուարդ Բեզոյանի, նախկին համայնքապետ Աղվան Գրիգորյանի, ԱԺ նախկին պատգամավոր Նապոլեոն Ազիզյանի անունները:
Ռուզան ՄԻՆԱՍՅԱՆ
