Արաբագետ Սարգիս Գրիգորյանը կարծում է, որ եթե ԱՄՆ-ն եւ Ֆրանսիան չհրապարակեն եւ չհանրայնացնեն իրենց հետախուզական մարմինների տեղեկությունները Սիրիայում քիմիական զենք կիրառելու վերաբերյալ, ապա երկրորդ անգամ էլ նման զենք կօգտագործվի խաղաղ բնակչության նկատմամբ: Այսօր «Զարկերակ» ակումբում արաբագետն այսպիսի կանխատեսումներ արեց տեսակետ հայտնելով, որ զենքի կիրառումը ոչ թե Սիրիայի նախագահ Բաշար Ասադի, այլ ընդդիմադիր ուժերի ձեռքի գործն է:
Ըստ նրա, 3 տարի տեւած պատերազմում, վերջին օրերին հատկապես, որոշ երկրներ, որոնք հանդես եկան ռազմական միջամտության հայտարարություններով սպառնալիքները բավականին տեսանելի դարձան:
Ինչ վերաբերում է Սիրիայում մնացած մոտ 50 հազար հայերին, ապա արաբագետը կարծում է, որ նրանց կյանքին սպառնացող վտանգն ավելի է մեծացել, չնայած, որ հայերը չեզոք դիրք են գրավել եւ որեւէ ուժի սատարելու հայտարարություններով հանդես չեն գալիս:
Հարցին, թե ինչո՞ւ Հայաստանի իշխանություններն ավելի կտրուկ քայլեր չեն ձեռնարկում եւ ինչու հայտարարություններով հանդես չեն գալիս սիրիահայերի մասով, պարոն Գրիգորյանն ասաց, որ ՀՀ իշխանությունները թե’ բացահայտ, եւ թե’ գաղտնի որոշ քայլեր ձեռնարկում են: Նրա մեկնաբանությունները` տեսանյութում.
Կարդացեք նաև
Aravot.am-ի հարցին, թե այս օրերին որոշ քաղաքագետներ 3-րդ համաշխարհային պատերազմի սկիզբ են կանխատեսում, արդյոք նման մտավախություն կա՞, արաբագետի կարծիքով միջազգային հանրությունը խելամիտ կգտնվի եւ թույլ չի տա նման զարգացումներ: Պարոն Գրիգորյանի պատասխաններն առավել մանրամասն` տեսանյութում
Մեկնաբանելով, երեկ Ադրբեջանի նախագահականի միջազգային կապերի ղեկավարի այն հայտարարությունը, թե Ադրբեջանը քիմիական զենքի կիրառման մասին իր դիրքորոշումը կհայտնի ԱՄՆ-ի հայտատարությունից հետո, պարոն Գրիգորյանը կարծում է, որ այն նսեմացնում է ՄԱԿ-ի դերը:
Արաբագետը նաեւ համոզված է, որ Սիրիայի շուրջ զարգացումներն ուղղված են ոչ միայն Սիրիայի դեմ այլեւ տարածաշրջանում ուժերի հարաբերակցության փոփոխությանը: Ըստ նրա, այսօր Սիրիայում բավական լուրջ նավթի եւ գազի պաշարներ կան: Նրա ներկայացմամբ, իսլամիստները գալով Սիրիա, իրենց ուժերն ամրապնդում են, որը ոչ միայն մեծ վտանգ է ներկայացնում Սիրիայի համար այլեւ տարածաշրջանի:
Լուսինե ԲՈՒԴԱՂՅԱՆ
