Հոկտեմբերի 10-ին ԱԺ եվրոպական ինտեգրման հարցերի մշտական հանձնաժողովի նախագահ Նաիրա Զոհրաբյանը հանդիպեց Լիտվայի Հանրապետության խորհրդարանի փոխնախագահ Գեդիմինաս Կիրկիլասի գլխավորած պատվիրակության հետ:
Հյուրերի խնդրանքով Նաիրա Զոհրաբյանը ներկայացրեց Հայաստանի՝ Մաքսային միությանը անդամակցելու հայտարարությունից հետո երկրում ստեղծված իրավիճակը՝ նշելով, որ Հայաստանի համար անչափ կարեւոր է շարունակել երկխոսությունը Եվրոպական միության հետ այն հիմնարար բարեփոխումների շրջանակում, որոնց ուղղությամբ արդեն իսկ որոշակի աշխատանք է կատարվել: Տիկին Զոհրաբյանը հույս հայտնեց, որ Վիլնյուսում հնարավոր կլինի Հայաստանի հետ ստորագրել քաղաքական փաստաթուղթ, որը հնարավորություն կտա շարունակելու Եվրոպական միության, եվրոպական հանրության հետ երկխոսությունը: Կողմերը քննարկեցին, թե ինչպիսի բովանդակություն կարող է ունենալ ստորագրվելիք հնարավոր փաստաթուղթը: Հանձնաժողովի նախագահը նշեց, որ փաստաթուղթը կարող է ներառել կոռուպցիայի դեմ պայքարին, մարդու իրավունքներին, ժողովրդավարությանը, արդարադատության համակարգի բարեփոխումներին առնչվող դրույթներ:
Կողմերը քննարկեցին Հայաստանի ներքաղաքական իրավիճակին առնչվող հարցեր:
ՀՀ ԱԺ
