ՀՀ փոխվարչապետ, տարածքային կառավարման նախարար Արմեն Գեւորգյանն այսօր Փարիզից մեկնեց Լիոն, որտեղ հանդիպում ունեցավ Լիոնի քաղաքապետ Ժերար Կոլոմբի եւ Ռոն Ալպի տարածաշրջանի խորհրդի նախագահ Ժան Ժակ Քեյրանի հետ:
Լիոնի քաղաքապետի հետ հանդիպմանը մասնակցում էր նաեւ Լիոնի գործընկեր Երեւանի քաղաքապետ Տարոն Մարգարյանը: Կողմերը քննարկեցին Հայաստանի եւ Ֆրանսիայի համայնքների միջեւ համագործակցության ներկա մակարդակին եւ դրա զարգացման հեռանկարներին վերաբերող հարցեր: Մասնավորապես անդրադարձ եղավ Երեւանի եւ Լիոնի միջեւ արդեն 20-ամյա փոխգործակցությանը: Նշվեց, որ քաղաքների միջեւ ձեւավորվել են գործակցության ավանդույթներ, սակայն միաժամանակ առկա է նաեւ հարաբերութունների զարգացման մեծ ներուժ: Զրուցակիցները գոհունակությամբ նկատեցին, որ պարբերաբար փոխայցելություններն ու հանդիպումները օգնում են գործակցության նոր ուղղություններ բացահայտել:
Փոխվարչապետը շփումների ակտիվացման եւ կապերի խորացման տեսակետից արդյունավետ հարթակ համարեց նաեւ հայ-ֆրանսիական ապակենտրոնացված համագործակցության համաժողովը, որը հավակնում է դառնալ ավանդական եւ կարող է ծառայել որպես գործուն մեխանիզմ` այս ձեւաչափով փոխգործակցության համակարգման համար:
Հանդիպմանը գործընկեր քաղաքների ղեկավարները նաեւ անդրադարձան այն ծրագրերին եւ մտադրություններին, որոնք նախատեսում են կյանքի կոչել:
Կարդացեք նաև
Հանդիպումից հետո Լիոնի քաղաքապետ Ժերար Կոլոմբի անունից՝ ի պատիվ ՀՀ պատվիրակության, տրվեց պաշտոնական ճաշ:
Փոխվարչապետի հաջորդ հանդիպումը Ռոն Ալպ տարածաշրջանի խորհրդի նախագահ Ժան Ժակ Քեյրանի հետ էր: Ա. Գեւորգյանը նախ շնորհակալություն հայտնեց համաժողովը հյուրընկալելու համար` ընդգծելով, որ դրա անցկացումը հենց այստեղ պատահական չէ, քանի որ Ռոն Ալպի հետ բավականին ընդգրկուն փոխգործակցություն է առկա:
Ռոն Ալպը գործընկեր է ընտրել «Հայաստանի համայնքների միությանը»` այսպիսով համագործակցություն սկսելով Հայաստանի ամբողջ տարածքում: Փոխվարչապետը նկատեց, որ փոխգործակցության երկու հիմնական ուղղությունները` տարածքային զարգացման եւ տեղական ինքնակառավարման մարմինների աջակցություն, առաջնահերթ են ՀՀ կառավարության համար եւ ընկած են առաջիկա բարեփոխումների հիմքում: Նա ընդգծեց, որ հայկական կողմը կարեւորում է այդ աշխատանքների շարունակումը եւ ողջունում է նոր փաստաթղթով այդ գործակցությունն ամրապնդելու մտադրությունը:
Պրն Քեյրանն իր հերթին վստահեցրեց, որ մտադիր են զարգացնել եւ ընդլայնել սկիզբ դրված համագործակցությունը եւ ակնկալում են, որ հետագա տարիներին այն արդեն ավելի շոշափելի արդյունքներ կարձանագրի:
Պրն Քեյրանի խնդրանքով փոխվարչապետն անդրադարձավ նաեւ առաջիկայում նախատեսվող բարեփոխումներին` նկատելով, որ այդ տեսանկյունից ֆրանսիական կողմի աջակցությունն ու փորձն օգտակար կարող են լինել դրանց հաջող իրականացման համար:
Փոխվարչապետն այնուհետեւ մասնակցեց հայ-ֆրանսիական ապակենտրոնացված համագործակցության համաժողովի պատվիրակների եւ հայ համայնքի ներկայացուցիչների մասնակցությամբ պաշտոնական արարողությանը, որի ժամանակ հանդես եկավ ելույթով` անդրադառնալով Հայաստանում ապակենտրոնացված կառավարման ուղղությամբ կատարված եւ կատարվող աշխատանքներին, այս ոլորտում հայ-ֆրանսիական համագործակցությանն ու, մասնավորապես, Ռոն Ալպի հետ ձեւավորված փոխգործակցությանը:
Պաշտոնական ելույթներից հետո «Հայաստանի համայնքների միության» եւ Ռոն Ալպի տարածաշրջանի միջեւ ստորագրվեց համագործակցության նորացված համաձայնագիրը, որով Հայաստանի համայնքների եւ Ռոն Ալպի միջեւ փոխգործակցությունն ավելի կընդլայվի եւ համակարգված բնույթ կստանա: Միության հետ համաձայնագիրը թույլ է տալիս հավասարապես աշխատել բոլոր գործընկեր համայնքների եւ մարզերի հետ, քանի որ միությունը համախմբում է Հայաստանի բոլոր համայնքներին:
Այսօր Գրենոբլում նաեւ համագործակցության նորացված համաձայնագիր են ստորագրել ՀՀ Գեղարքունիքի մարզն ու Ֆրանսիայի Իզերի նահանգը:
Հոկտեմբերի 16-ին Վալանսում աշխատանքները կսկսի հայ-ֆրանսիական ապակենտրոնացված համագործակցության համաժողովը:
ՏԿՆ հասարակայնության հետ կապերի բաժին
