ՀՀ ԿԳ նախարարության Նախնական եւ միջին մասնագիտական կրթության վարչության պետ Ռոբերտ Աբրահամյանը այսօր շարունակվող կրթության ոլորտին վերաբերվող աղվերանյան սեմինարի ժամանակ անդրադարձավ մասնագիտական կրթության եւ ուսուցման համակարգի բարեփոխումներին եւ մարտահրավերներին: Ռոբերտ Աբրահամյանը նշեց, որ ներկայումս մասնագիտական կրթության ոլորտում սովորում է 35000 մարդ, որից 7000-ը՝ արհեստագործական համակարգում: Աշխատում է նաեւ 4500 մանկավարժ եւ վարպետ: Նրա խոսքով, վերջին տարիներին իրականացվել են ե՛ւ ուսումնական հաստատությունների վերազինման եւ բովանդակային վերանայման աշխատանքներ: Տարեկան 800-1000 մասնագետ էլ վերապատրաստվում է:
Պատասխանելով Aravot.am-ի հարցին՝ պարոն Աբրահամյանը նշեց, որ ոլորտում ամենահիմնական խնդիրը գործատուների քիչ ներգրավումն է ուսուցման գործընթացում եւ երիտասարդների համար ուսումնական հաստատությունների գրավչության պակասը:
«Ստացվում է, որ գործատուների նվազ ներգրավվածությունը ուսուցման կազմակերպման գործում հնարավորություն չի տալիս ավելի որակյալ կրթության: Գործատուն պետք է լինի պահանջատերը, նա պետք է աջակցի ու մասնակցի ուսուցման գործընթացին: Երիտասարդության շրջանում կարեւոր է բարձրացնել հատկապես արհեստագործական կրթության վարկանիշը»,-հայտնեց վարչության պետը: Նա հավելեց, որ այսօր հանրապետությունում մասնավորապես շինանարական մասնագիտությունների գծով ունենք կադրերի պակաս, չնայած ամեն տարի ընդունելություն է կատարվում: Պատճառն այն է, որ երիտասարդների համար այդ տեսակ մասնագիտությունները գրավիչ չեն թվում: Ըստ Ռոբերտ Աբրահամյանի, ինչպես բարձրագույն, այնպես էլ միջին մասնագիտական կրթության ոլորտում էլ կան մասնագիտություններ, որոնք ավելի պահանջված են, երիտասարդությունը ավելի հակված է գնալ տնտեսագիտական բլոկի մասնագիտություններ, ՏՏ, տուրիզմի եւ սպասարկման ոլորտ: Ճարտարագիտական, տեխնոլոգիական, շինարարական մասանագիտություններն էլ պահանջված են գործատուների կողմից, սակայն երիտասարդները հաճախ չեն ցանկանում այդ ոլորտներում մասնագիտանալ:
ԿԳՆ վարչության պետի խոսքով, այդ մասնագիտությունների պարագայում անվճար տեղերի թիվը ավելի մեծ է: Ըստ նրա, խնդիրների լուծման ուղղությամբ կատարված աշխատանքերը տարեցտարի տալիս են դրական արդյունքներ՝ ավելացնելով հիմնական կրթության հենքով սովորողների թիվը:
Կարդացեք նաև
Գոհար ՀԱԿՈԲՅԱՆ
