Սոցիալական ապահովության պետական ծառայության նախկին պետ Վազգեն Խաչիկյանի եւ աշխատանքի, սոցիալական ապահովության նախարարության տասներկու աշխատակիցների դեմ հարուցված քրեական գործի դատաքննությունն ընդհատվել էր, երբ նոյեմբերի 28-ին Կոտայքի մարզի ընդհանուր իրավասության դատարանի դատավոր նշանակվեց նախագահող Մխիթար Պապոյանը (ՀՀ Նախագահի 26.11.2013թ. ՆՀ-309-Ա հրամանագիր):
Պապոյանի փոխարեն գործը մակագրվեց Մեսրոպ Մակյանի վրա:
Մեր տեղեկություններով դեկտեմբերի 26-ին նշանակվել է Վազգեն Խաչիկյանի եւ մյուսներ գործը, սակայն այդ մասին «ԴատաԼեքս» տեղեկատվական համակարգում չի գրվել:
Հիշեցնենք, որ Վազգեն Խաչիկյանին մեղադրանք է առաջադրվել այն բանի համար, որ նա, 2005թ. հունվարի 14-ից մինչև 2010թ. դեկտեմբերի 17– ն աշխատելով ՀՀ աշխատանքի և սոցիալական հարցերի նախարարության սոցիալական ապահովության պետական ծառայության պետի պաշտոնում, հանդիսանալով պաշտոնատար անձ, օգտվելով ծառայությունը կառավարելու իր լիազորություններից, ծառայության մի շարք պաշտոնատար և պատասխանատու անձանց հետ, կազմակերպված խմբով, 2006–2010թթ. ընկած ժամանակահատվածում, օգտագործելով իրենց պաշտոնեական դիրքը, պաշտոնեական կեղծիք կատարելու, այն է՝ կենսաթոշակի կասեցված վճարումը վերսկսելու վերաբերյալ վճարման իրավունք վերապահող կեղծ դիմումներ պատրաստելով կամ առանց այդ դիմումների վճարային ցուցակներում կենսաթոշակառուների ստորագրությունները կեղծելու միջոցով անհիմն ելքագրել և յուրացման եղանակով հափշտակել են իրենց վստահությանը հանձնված, մահացած կամ ՀՀ տարածքից բացակայող կենսաթոշակառուների վճարումը կասեցված կենսաթոշակի առանձնապես խոշոր չափերի` 260.956.681 ՀՀ դրամ գումարները:
Կարդացեք նաև
Վազգեն Խաչիկյանը, ըստ մեղադրանքը պաշտպանող երեք դատախազների, խարդախությամբ հափշտակել է պետական բյուջե վերականգնման ենթակա, առանձնապես խոշոր չափերի` 29.000.000 ՀՀ դրամ գումար:
Ռուզան ՄԻՆԱՍՅԱՆ
