ԼՂՀ Ազգային Ժողովի պատգամավոր Վիտալի Բալասանյանը, 2013թ. դեկտեմբերի 29-ին իր հանդեպ կատարված մահափորձի առնչությամբ, հանդես է եկել հայտարարությամբ, որում մասնավորապես դժգոհություն է արտահայտում ԼՂՀ դատախազության կայքում մահափորձի վերաբերյալ 05.01.2014թ. տեղադրված հաղորդագրության առթիվ:
Դատախազությունը ԼՂՀ Սահմանադրությամբ և <Դատախազության մասին> ԼՂՀ օրենքով իրեն վերապահված լիազորությունների շրջանակում հսկողություն իրականացնելով հետաքննության և նախաքննության օրինականության նկատմամբ, հիմք ընդունելով մահափորձի առնչությամբ հանրային մեծ հետաքրքրությունը, ինչպես նաև ապահովելով դատախազության թափանցիկ գործելաոճը, ԼՂՀ քրեական դատավարության օրենսգրքի 213-րդ հոդվածի /Նախնական քննության տվյալների հրապարակման անթույլատրելիությունը/ պահանջների լիարժեք պահպանմամբ, հանրային իրազեկման է ներկայացրել համապատասխան հաղորդագրություն` նույն տեքստում միաժամանակ ծանուցելով, որ հանցագործության մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ քրեական դատավարության օրենսգրքով սահմանված կարգով` դատարանի` ուժի մեջ մտած դատավճռով:
Անհրաժեշտ ենք համարում նշել, որ վերոհիշյալ հաղորդագրությունից բացի, ԼՂՀ դատախազության կայքում տեղադրվել են նաև մահափորձի կատարման մեջ կասկածվող անձանց կողմից կատարված այլ հանցագործությունների մասին հաղորդագրություններ:
Վ. Բալասանյանը հայտարարության մեջ մտահոգություն է հայտնում նաև <Ժողովրդի մեջ իր անձի վերաբերյալ պտտվող տարբեր վարկաբեկիչ լուրերի> առնչությամբ, որը, սակայն, ոչ մի կապ չունի ԼՂՀ դատախազության վերոհիշյալ հաղորդագրության հետ:
ԼՂՀ դատախազությունը վերահաստատում է իր վճռականությունը` օրենսդրությամբ վերապահված լիազորությունների շրջանակում ապահովելու նախաքննության բազմակողմանիությունը, լրիվությունը և օբյեկտիվությունը:
ԼՂՀ դատախազություն
