ՀՀ ոստիկանապետ Վլադիմիր Գասպարյանն այսօր Շիրակի մարզպետարանում մարզի բոլոր բարձրաստիճան պաշտոնյաներին, գյուղապետերին, դպրոցների տնօրեններին ներկայացրեց մարզի նոր ոստիկանապետին` Վարդան Նադարյանին, որը նրա բնութագրմամբ, թրծված գնդապետ է:
Այնուհետ Վլադիմիր Գասպարյանը երկու ժամ շարունակ խոսեց` ինքնատիպ մտքեր հայտնելով, թե ոստիկանի աշխատանքի նրբությունների, թե հանցագործի հոգեբանության, շիրակցիների անտարբերության, ինչպես նաև Գյումրիում տիրող մթնոլորտի մասին:
Շիրակցի պաշտոնյաները կլանված լսում էին նրան. նույնիսկ Սիզավետի գյուղապետը նստած տեղից բացականչեց. « էս ինչ հաճելի մարդ էր, ինչ հաճելի է խոսում»:
Վլադիմիր Գասպարյանը իր խոսքում չխնայեց նստածներից և ոչ մեկին, ովքեր, ըստ նրա, հանդուրժող են սրիկայության ու անօրինության նկատմամբ, աչք են փակում հանցագործությանը՝ վատամարդ դուրս չգալու համար:
Կարդացեք նաև
Հեգնեց Վարդան Ղուկասյանի նոր քաղաքապետարան բացելը, նույն խստությամբ էլ խոսեց իր կողքին նստած Գյումրու քաղաքապետ Սամվել Բալասանյանի մասին` նրան, որպես հանցագործություն կոծկողի ու վատամարդ դուրս չգալու օրինակ բերելով:
Անդրադառնալով Գյումրու պատվախնդրությանը` ոստիկանապետն ասաց. «Ոստիկանությունը կարող է բարեփոխվել և բարեփոխվում է, նորոգվում ենք մենք, սակայն ինչ-որ մի տեղ կա, երբ հասնում է ոստիկանությունը, և այլևս արդյունավետ չի կարող լինել ոստիկանության աշխատանքը, եթե հասարակությունը, պետական մարմինները, քաղաքացին չի աջակցում ոստիկանությանը»:
Ու այս խոսքի վրա մատնանշեց իր կողքին նստած Գյումրու քաղաքապետին, որը ոստիկանություն հայտարարություն չի ներկայացրել Վարդան Ղուկասյանի որդու` իր տան վրա գալու ու սպառնալիքներ հնչեցնելու մասին:
«Չի կարելի հասարակությունը, քաղաքը, շրջանը բերել պատշաճ որակի, եթե համախմբված աշխատանք չի գնում: Ես ձեզ վառ օրինակ ասեմ, եթե հարգարժան քաղաքապետը հայտարարություն չի տալիս ոստիկանությանը, որ նմանատիպ դեպքեր են տեղի ունեցել, բնականաբար ոստիկանության մոտեցումները պետք է լինեն նույնպես փիլիսոփայորեն, որովհետև մեր մասնագիտությունը կոնկրետ մասնագիտություն է, հայտարարության տակ մենք պետք է քննություն կատարենք, ուսումնասիրենք, տեսնենք հանցակազմ և այլն և այլն… Լրատվամիջոցները նման պարագաներում շատ ակտիվորեն հարձակվում են ոստիկանության վրա, որ տեսնում եք այս կամ այն երևույթն է տեղի ունենում, բայց ոստիկանությունը պասիվ է իր դերակատարման մեջ: Բայց ոստիկանությունը պասիվ չէ, ոստիկանությունը օրենքի գերիշխանության կողմնակիցն է, եթե նույնիսկ ինչ-որ մի բանում որոշակի համոզմունք ունենք՝ մենք չենք կարող մեր համոզմունքը նյութավորել: Դրա համար պետք են պրոցեսներ: Ես մի օրինակով ուզեցի ուղղակի ճշտել պրոցեսները և հանել այն մեղադրանքները, որոնք հնչում են ոստիկանության հասցեին», -արդարացավ Վլադիմիր Գասպարյանը:
Մանրամասները` տեսանյութում:
Նունե ԱՐԵՎՇԱՏՅԱՆ
