«Ինչո՞ւ չեն թողնում գնանք, տեսնենք՝ ում են պատվոգրեր տալիս: Ում են մեդալներ , խրախուսական պարգեւատրումներ տալիս, տեսնենք որ մի զինվորին սպանողին են հերթական անգամ պատվոգիր ու խրախուսական տալիս»,- այսօր Ա. Սպենդիարյանի անվան ազգային օպերայի եւ բալետի թատրոնի շենքի մոտ բողոքում էին բանակում խաղաղ պայմաններում մահացած զինվորների մայրերը: Նրանք դիմադրում էին ոստիկանական պատին ու ոստիկանների հրմշտոցին:
Հիշեցնենք, որ թատրոնում այսօր Բանակի օրվան նվիրված տոնական համերգ էր, որին մասնակցում էին բարձրաստիճան պաշտոնյաները: Իսկ սեւազգեստ մայրերը ցանկանում էին տեսնել համերգի մասնակից ՊՆ նախարարին, ՀՀ նախագահին՝ հիշեցնելու բանակում մահացած իրենց որդիների չբացահայտված գործերը:
Նրանք ոստիկանների հետ երկար վիճեցին, նրանց անվանեցին «Սերժի շներ», հետո ճեղքեցին ոստիկանական պատն ու փորձեցին թատրոնի գլխավոր մուտքին հասնել Մաշտոցի պողոտան շրջանցելով:
Կարդացեք նաև
«Տեսնում եք՝ ինչ է կատարվում, փողոցն էլ շրջանցենք, նույն բանը կլինի: Ինչ անենք, մեզ գցենք մեքենաների տակ: 4 մամայից էսքան վախենո՞ւմ եք, մի հսկայական բանակ են մի քանի պատնեշանոց բերել մեր դեմ կանգնեցրել: Թող գնան հայոց բանակում, այ, որ Ղարաբաղում դիվերսիաներով հարձակվում են մեր երեխեքի վրա, թող գնան սահմանները, մեր երեխեքին պաշտպանեն… պահանջում ենք մեր երեխաների սպանության մեղավորներին պատժել, մեզ հանգիստ չկա, չենք հանգստանալու, պայքարելու ենք, ինչո՞ւ չեն պատժում»,- մեզ հետ զրույցում դժգոհեց Վալերիկ Մուրադյանի մայրը՝ Նանա Մուրադյանը:
Մահացած զինվորների մայրերին ոստիկանները, փողոցից հրելով, մայթ բերեցին, իսկ Նանա Մուրադյանը զայրացավ ու շրջվեց մի քանի անգամ հարվածեց ու ապտակեց իրեն հրող ոստիկաններին:
Հետո ոստիկաններից մեկը հանձնարարեց 4 հրեշտակի իր հետեւից գնալ՝ ուղեկցելու փողոցն անցնող մայրերին:
Նանա Մուրադյանն էլ հեգնեց՝ գոնե հրեշտակները վանկերի բաժանեք. «հրեշ եւ տակ, ու ասեք հրեշներ եկեք իմ հետեւից»:
Երկար քաշքշոցից հետո մայրերին թույլատրեցին հասնել Ազատության հրապարակ:
Մանրամասները՝ շուտով տեսանյութում
Արփինե ՍԻՄՈՆՅԱՆ
