«Հին Երեւան»-ի նախագիծը, որն արդեն քանի տարի է տեղից չի շարժվում, փոքր-ինչ առաջ է գնացել: Այսօր այս մասին ասաց Երեւանի գլխավոր ճարտարապետ Տիգրան Բարսեղյանը` հայտնելով, որ ճարտարապետներով հավաքվել են, մեկ անգամ եւս այդ հարցը քննարկել են եւ փետրվարի վերջին, կառուցապատողի հարցը կորոշեն:
Հարցին, թե որպես մայրաքաղաքի նոր ճարտարապետ ինչ փոփոխություններ է նախատեսում, պարոն Բարսեղյանն ասաց, որ քաղաքի գլխավոր հատակագիծը «տարիների հիմնարար փաստաթղթի ձեւավորման արդյունք է» եւ որ ինքը արմատական փոփոխություններ չի նախատեսում:
Aravot.am-ի հարցին, թե արդեն քանի տարի է Երեւանի քաղաքապետը, փոխքաղաքապետերը ծրագրում են մայրաքաղաքի ճարտարապետական տեսքն աղավաղող, «խայտաբղետ» գովազդները հանել, սակայն կարծես թե նման գովազդները քաղաքից չեն պակասում, գլխավոր ճարտարապետն ասաց, որ որոշ փողոցներից դրանք արդեն հանվել են: Նրա մեկնաբանությունները` տեսանյութում
Պարոն Բարսեղյանը նույնպես խոստովանում է, որ պիկ ժամերին դժվար է երթեւեկելը, քանի որ, ըստ նրա, «բոլոր խոշոր քաղաքների խնդիրների մեջ է դա մտնում եւ Երեւանն, իր առանձնահատկություններով հանդերձ, առանձնապես չի տարբերվում խոշոր քաղաքների տրանսպորտային տրաֆիկներից»:
Կարդացեք նաև
Տիգրան Բարսեղյանը նաեւ անդրադարձավ Սայաթ-Նովա 23, 25 շենքերի սեփականաշնորհված շքամուտքին, ասելով, որ հարցը գտնվում է դատական ատյաններում, այդ իսկ պատճառով իրենք չեն կարող միջամտել:
Գլխավոր ճարտարապետը խոսելով առաջիկա ծրագրերից՝ ասաց, որ այս տարի
բարենպաստ միջավայր կստեղծեն հենաշարժողական խնդիրներ ունեցող մարդկանց համար: Հայտնի մարդկանց` Անտոն Քոչինյանի, Կարեն Դեմիրճյանի, Գարեգին Նժդեհի, Նարեկացու, Ջիվանու, Կիմ Երիցյանի, մարշալ Բաբաջանյանի եւ Սիլվա Կապուտիկյանի արձանները կտեղադրեն կենտրոնական փողոցներում,
մայրաքաղաքը շրջանցող տրանսպորտային ճանապարհների կառուցումը կշարունակվի. Իսակով-Լենինգրադյան մայրուղին կմիացվի Արշակունյաց պողոտային: Մայրաքաղաքում, ըստ ճարտարապետի, հայտնի բրենդերով մի քանի հյուրանոց էլ կկառուցվի:
Լուսինե ԲՈՒԴԱՂՅԱՆ
