Այսօր «Մեդիա կենտրոնում» քննարկվեց «Զվարթնոց» օդանավակայանի ուղեւորային հին համալիրի քանդման հարցը: Ներկա էին արվեստաբան, Արվեստի քննադատների ազգային ասոցիացիայի նախագահ Ռուբեն Արեւշատյանը, ճարտարապետներ Զոհրաբ Բաուերը, Սարհատ Պետրոսյանը, Գուրգեն Մուշեղյանը:
Հայտնի է, որ ՀՀ կառավարությունը 2013 թ. դեկտեմբերի 26-ի նիստում քննարկել ու հավանության է արժանացրել «Զվարթնոց» օդանավակայանի կոնցեսիոների կողմից ներկայացված մաստեր պլանը, որտեղ նաեւ ներառված է «Զվարթնոց» օդանավակայանի հին շենքի քանդման գործընթացը: Միաժամանակ, կառավարության նիստի ժամանակ ՀՀ վարչապետը թե´ կոնցեսիոներին, թե´ քաղաքացիական ավիացիայի վարչությանը առաջարկել է մասնագիտական շրջանակներում քննարկել այս հարցը:
Սարհատ Պետրոսյանը կարծում է, որ պետք է չսպասել մինչեւ այն պահը, որ կառավարությունը քննարկումներ նախաձեռնի, ըստ նրա, այդպես մենք 15-20 տարի սպասում ենք, որ կառավարությունը հետեւի Սահմանադրությանը եւ պահպանի հուշարձանները. «Այն հակամշակութային մոտեցումները, որ եղել են Երեւանի տարբեր հուշարձանների նկատմամբ, առ այսօր շարունակվում են»:
Զոհրաբ Բաուերը գտնում է, որ պետք է խոսել հուշարձանի պահպանության մասին, եւ ոչ թե քանդման. «Զվարթնոցի» խնդիրը պետք է լուծել իրավական դաշտում եւ շեշտադրել մշակութային կոմպոնենտի վրա»:
Կարդացեք նաև
Նա նաեւ վստահեցրեց, որ մինչ այժմ ոչ մի աշխատանք չի տարվել ուսումնասիրելու շենքի սեյսմակայունությունը. «Ի՞նչն է խնդիրը, որ շահագործողի կողմից կա կառույցի քանդման հարցը: Այս հարցի պատասխանը չկա»,-նշեց նա:
Գուրգեն Մուշեղյանի փոխանցմամբ էլ`«Եթե այսօր խոսում են չափորոշիչների մասին, ապա հարկ է նկատել, որ ժամանակին այլ չափանիշներով էին մշակութային հուշարձան համարվում: Իսկ «Զվարթնոցի» շենքը մի ամբողջ ժամանակաշրջանի պատմություն է, լավագույն գործ ու այն ընդամենը խնամքի կարիք ունի»:
Զոհրաբ Բաուերը շեշտեց, որ շենքի նկատմամբ համապատասխան խնամք պետք է տարվեր, ինչը չի արվել, որի համար պետք է պատասխան տրվի. « Խնդիրը իրավական դաշտում պետք է լուծել, հակառակ դեպքում, ոչ մի շահագործող չի մտածելու այս մասին»:
«Լծակներ կան իրականությունը վերականգնելու: Ցանկություն է հարկավոր՝ լուծումներ պետք է գտնել»,- ավելացրեց Գուրգեն Մուշեղյանը:
Եվա ՀԱԿՈԲՅԱՆ
