«Գորիսի հիվանդանոցի տուբերկուլոզային բաժանմունքի շենքային պայմանները չեն համապատասխանում գործող պահանջներին եւ չի գործում վարակի հսկողության ոչ մի բաղադրիչ, ինչի արդյունքում բուժման փոխարեն ապահովվում է վարակի ներհիվանդանոցային տարածումը»,-վաղը կառավարության նիստում առողջապահության նախարար Դերենիկ Դումանյանն այսպիսի պատճառաբանությամբ վարչապետ Տիգրան Սարգսյանին կհայտնի, որ Գորիսի հիվանդանոցի տուբերկուլոզային բաժանմունքը փակվելու է:
Ինչպես տեղեկանում ենք կառավարության նիստի օրակարգից, հիվանդանոցային պայմաններում բուժում ստանալու կարիք ունեցող տուբերկուլոզով հիվանդները կուղեգրվեն «Հանրապետական հակատուբերկուլոզային դիսպանսեր»: Իսկ մնացած ոչ մանրէազատ հիվանդներին կբուժեն տուբերկուլոզի դեմ պայքարի կաբինետում:
Բաժանմունքը փակելու պատճառներից մեկն էլ, Դերենիկ Դումանյանը նշում է հիվանդներով թերի ծանրաբեռնված լինելը:
Ըստ նույն աղբյուրի, Սյունիքի մարզում գործում է 2 մարզային տուբերկուլոզային բաժանմունք` «Գորիս» եւ «Կապան» բժշկական կենտրոններում: «Գորիս» բժշկական կենտրոնի տուբերկուլոզային բաժանմունքներում 2011թ. եւ 2012թ.-ին համապատասխանաբար հոսպիտալացվել է 105 եւ 88 հիվանդ, որոնցից 2011թ.-ին` 78 առաջնակի հիվանդ, իսկ 2012թ.-ին` 66:
Լուսինե ԲՈՒԴԱՂՅԱՆ
