ԱՄՆ դեսպանատունը փետրվար ամսվա ընթացքում իրականացնում է մի շարք միջոցառումներ ԱՄՆ պետքարտուղարության «Կյանք առանց սահմանների» արշավի շրջանակում՝ շեշտադրելով բազմազանության ու ներառական հասարակության հիմնարար ամերիկյան արժեքները:
Փետրվարի 24-26-ը ԱՄՆ դեսպանատունը կhյուրընկալի ինը պարաօլիմպիական խաղերի մասնակից, այդ խաղերում ութ ոսկե մեդալների արժանացած և Բոստոնի վեց մարաթոնների հաղթող Քենդըս Քեյբլին: 21 տարեկան հասակում ողնաշարի վնասվածք ստանալուց հետո տ-ն Քեյբլը ստիպված էր սպորտում ինքնադրսևորման նոր ուղիներ գտնել: Նա դարձավ հաշմանդամություն ունեցող անձանց շահերի եռանդուն պաշտպան: Հայաստանում գտնվելու ընթացքում նա հանդիպումներ կունենա պետական պաշտոնյաների, համայնքային առաջնորդների, մանկավարժների և հաշմանդամություն ունեցողների հարցերով զբաղվող ակտիվիստների հետ:
Փետրվարի 25-ին դեսպանը կբացի «Կյանք առանց սահմանների» խորագիրը կրող նկարների ցուցահանդեսը, որտեղ ներկայացված են հայ նկարիչների, այդ թվում հաշմանդամություն ունեցող նկարիչների ստեղծագործություններ: Բացման միջոցառման ժամանակ հանդես կգա «Փարոս» երգչախումբը: Ցուցահանդեսը կազմակերպվել է ՆՓԱԿ նորարար փորձառական արվեստի կենտրոնի հետ համատեղ, որը քաջալերում է կյանքն առանց սահմանների ու սահմանափակումների, որը հաղթանակ է հասարակության կողմից պարտադրված ընկալումների նկատմամբ: Ցուցահանդեսը ներկայացնում է, թե ինչպես հաշմանդամություն ունեցող անձինք կարող են լիարժեք կերպով ինտեգրվել առօրյա տարբեր զբաղմունքներում, որոնք շատերիս համար սովորական բան են համարվում: Ցուցահանդեսը բաց կլինի բոլորի համար և կտևի երկու շաբաթ:
Փետրվարի 26-ին դեսպանը բացման խոսքով հանդես կգա «Աղջիկը լուսնի վրա» ինքնատիպ պարային ներկայացման պրեմիերայի ժամանակ. ներկայացում, որտեղ կրկին ի ցույց է դրվում, թե ինչպես հաշմանդամություն ունեցող անձինք կարող են լիարժեք ինտեգրվել առօրյա կյանքում: Տաղանդաշատ պարուսույց Արինա Արարատյանի այս բեմականացման մեջ Սունդուկյանի անվան ազգային ակադեմիական թատրոնի բեմում պրոֆեսիոնալ պարողների կողքին հանդես են գալիս սիրողական պարի հաշմանդամ վարպետները: «Աղջիկը լուսնի վրա» ներկայացումը կցուցադրվի նաև փետրվարի 27-ին, մուտքը՝ անվճար տոմսերով:
Փետրվարի 12-ին դեսպան Հեֆերնը եղավ Գավառի երեխաների վերականգնողական և ռեսուրս կենտրոններում: ԱՄՆ ՄԶԳ-ի ու Խաղաղության կորպուսի աջակցությամբ այս կենտրոնները ուսուցումներ են անցկացնում ֆիզիկական ու մտավոր զարգացման խնդիրներ ունեցող երեխաների ծնողների համար և օժանդակում են նրանց: «Այս կենտրոնների կողմից մատուցվող ծառայությունների շնորհիվ երեխաները մնում են ընտանիքում, ծնողների հետ և չեն հայտնվում խնամատար հաստատություններում», – ասաց դեսպան Հեֆերնը:
Կարդացեք նաև
Վերոհիշյալ միջոցառումներն անցկացվում են այն ակնկալիքով, որ դրանց կհաջորդեն քննարկումներ ու խորհրդածություններ, որոնք կտանեն դեպի առավել ներառական, բազմազան, հետևաբար, նաև ամուր հասարակություն, որտեղ ոչ միայն գնահատում են հաշմանդամություն ունեցող անձանց ներդրումները, այլ նաև օգտագործում են նրանց եզակի ձիրքերը:
Հայաստանում ԱՄՆ դեսպանատուն
Մամլո հաղորդագրություն
