Այսօր ՀՀ Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանում դատավոր Արթուր Մկրտչյանի նախագահությամբ կայացավ «Armenia Today» լրատվական կայքի համակարգող, վերլուծաբան Արգիշտի Կիվիրյանի դեմ հարուցված քրեական գործով երկրորդ դատական նիստը:
Հիշեցնենք, որ Արգիշտի Կիվիրյանը մեղադրվում է 2013թ. օգոստոսի 24-ին Կոմիտաս 5 հասցեում տեղի ունեցած բողոքի ակցիայի ժամանակ իրեն բերման ենթարկող ոստիկանի նկատմամբ բռնություն գործադրելու մեջ: Նշենք նաեւ, որ Արգիշտի Կիվիրյանի դեմ գործ է հարուցվել ՀՀ ոստիկանության Երեւան քաղաքի վարչության ՊՊԾ գնդի 1-ին հատուկ գումարտակի, 2-րդ վաշտի, 3-րդ դասակի հրամանատար Վահան Վրթանեսյանի հաղորդման հիման վրա, այն պատճառաբանությամբ, որ Արգիշտի Կիվիրյանը հարվածներ է հասցրել իրեն, ապա ինքնավնասվել՝ գլուխը հարվածելով ոստիկանական ավտոմեքենայի դռանը:
Արգիշտի Կիվիրյանը մեղադրվում է ՀՀ ՔՕ 316-րդ հոդվածի 1-ին մասով (իշխանության ներկայացուցչի նկատմամբ կյանքի կամ առողջության համար ոչ վտանգավոր բռնություն գործադրելը կամ բռնություն գործադրելու սպառնալիքը):
Այսօր կայացած դատական նիստի ժամանակ պետք է ցուցմունք տար տուժող ոստիկանը՝ Վահան Վրթանեսյանը, սակայն նա չէր ներկայացել դատարան, ինչի առնչությամբ Արգիշտի Կիվիրյանի հարցին, թե ինչո՞ւ տուժողը չի ներկայացել, դատարանը տեղեկացրեց, որ նա հիվանդ է:
Կարդացեք նաև
Պաշտպանական կողմը համաձայնվեց հետաձգել դատական նիստը, այն նշանակելով այն մարտի 4-ին:
Եվա ՀԱԿՈԲՅԱՆ
