Իրավագիտության ամեն մագիստրոս չէ, որ կարող է դառնալ փաստաբան. «Փաստինֆո»

Մարտի 4-ին Սահմանադրական դատարանը քննության կառնի քաղաքացի Գևորգ Սլոյանի դիմումի հիման վրա գործը: Դիմողը վիճարկում է «Փաստաբանության մասին» ՀՀ օրենքի 45.6-րդ հոդվածի 1-ին մասի սահմանադրականությունը:
Վիճարկվող դրույթով սահմանվում է Փաստաբանական դպրոցի ունկնդրի կարգավիճակը: Ըստ այդմ, Փաստաբանական դպրոցի ունկնդիր կարող է լինել այն գործունակ ֆիզիկական անձը, որն ունի իրավաբանական կրթության բակալավրի կամ դիպլոմավորված մասնագետի որակավորման աստիճան՝ բացառությամբ, եթե նա դատապարտվել է՝ դիտավորությամբ կատարված հանցագործության համար, և նրա դատվածությունը մարված կամ հանված չէ:

Գ.Սլոյանը ՍԴ ներկայացրած իր դիմումում, մասնավորապես, նշել է, որ ՀՀ-ում սահմանված է բարձրագույն մասնագիտական կրթության որակավորման երեք աստիճան՝ բակալավր, մագիստրոս և դիպլոմավորված մասնագետ: Ըստ նրա, կարելի է եզրակացնել, որ մագիստրոսի որակավորումն ավելի բարձր որակավորման աստիճան է, քան բակալավրինը:

Դիմողը գտնում է, որ վիճարկվող օրենքի դրույթները փաստաբանական դպրոցի ունկնդրի կարգավիճակ ձեռք բերելու համար նախատեսելով Հայաստանում սահմանված որակավորման երեք աստիճաններից երկուսից մեկի՝ բակալավր կամ դիպլոմավորված մասնագետ, առկայության պահանջը, խտրական վերաբերմունք են սահմանում իրավագիտության մագիստրոսի որակավորման աստիճան ունեցող անձանց նկատմամբ, ինչը չունի որևէ օբյեկտիվ և ողջամիտ արդարացում և չի հետապնդում իրավաչափ նպատակ:

Ի դեպ, Գ.Սլոյանն անձամբ բախվել է այս խնդրին: 2012 թվականի հունիսի 23-ին նա դիմել է ՀՀ փաստաբանական դպրոցի ընդունելության քննություններին մասնակցելու նպատակով։ Օրեր անց նա ստացել է փաստաբանական դպրոցի ընդունելության հանձնաժողովի նախագահի որոշումը՝ հավակնորդի կարգավիճակից զրկելու և 2012թ.-ին ՀՀ փաստաբանական դպրոցի ընդունելության քննություններին մասնակցելուն թույլ չտալու մասին։ Մերժման որոշումը հիմնավորվել է «Փաստաբանության մասին» ՀՀ օրենքի 45.6-րդ հոդվածի 1-ին մասի հիմքով:

Գ.Սլոյանն այս որոշումը բողոքարկել է դպրոցի խորհրդին՝ պահանջելով վերացնել ՀՀ փաստաբանական դպրոցի ընդունելության հանձնաժողովի նախագահի որոշումը, ինչը սակայն մերժվել է: Հետագայում նաև այն բողոքարկել է նաև դատական կարգով, սակայն հայցը չի բավարարվել:

Նյութի մանրամասները կարդացեք «Փաստինֆո»-ի կայքում