Մաքսային միությանը Հայաստանի անդամակցումն այլևս անշրջելի է, իսկ եվրաինտեգրումը` տեսանելի ապագայում անհնարին։ Այս թեզը մարտիմեկյան հանրահավաքում առաջ քաշեց Հայաստանի առաջին նախագահ Լեւոն Տեր-Պետրոսյանը: Զարգացնելով իր միտքը, նա ասաց, որ Հայաստանը պետք է գնա Մաքսային միություն`միայն առանց գործող նախագահ Սերժ Սարգսյանի: Այսօր, Aravot.am-ի խնդրանքով անդրադառնալով Լեւոն Տեր-Պետրոսյանի այս դիտարկումներին, Վրաստանում եւ Հայաստանում Նիդեռլանդների թագավորության դեսպան Հանս Հորբախն ասաց, որ Հայաստանի որոշելիքն է` հետագա զարգացման ո՞ր ուղղությունն ընտրել: «Բայց դրանից մեր հարաբերությունները չեն փչանա»,- հավելեց դեսպանը:
Պարոն դեսպանն, ում նստավայրը Թբիլիսին է, Երեւանում է գտնվում, մասնակցելու՝ «2014 թվականի Միջուկային անվտանգության գագաթաժողովի ներկայացում /Հաագա/. առանցքային գաղափարներ և նոր լուծումներ» խորագրով գիտաժողովին, որի կազմակերպիչը Երեւանում Գլոբալիզացիայի և տարածաշրջանային համագործակցության վերլուծական կենտրոնն (ԳՏՀՎԿ) է:
Միջուկային զենքի չտարածման, միջուկային անվտանգության խնդիրներով աշխարհը սկսեց զբաղվել դեռ 2009 թվականից`ԱՄՆ նախագահ Բարաք Օբամայի նախաձեռնությամբ: Մինչ այժմ այս հարցով երկու համաշխարհային կոնֆերանս է կազմակերպվել` Վաշինգտոնում, ապա Սեուլում: Երրորդը նախատեսվում է մարտին՝ Հաագայում: Հետխորհրդային երկրներից նման զենք կար Ղազախստանում եւ Ուկրաինայում, որը, հետագայում, համապատասխան փաստաթղթերի հիմա վրա, տեղափոխվեց ՌԴ:
Հաագայում կայանալիք հավաքի նպատակն է`կանխել միջուկային տեռորիզմն աշխարհում` ընդգրկելով միջազգային բոլոր կառույցները եւ պետությունները: Պարոն դեսպանն ասաց, որ համաժողովում, մասնավորաբար, կքննարկվեն միջուկային նյութի քանակության նվազեցման հարցերը, առկա միջուկային նյութի որակի բարելավման եւ դրա օգտագործման կարգավորման անվտանգության հարցերը: «Որպես տրանսպորտային հանգույց, մեր երկիրը ստիպված է հաղթահարել միջուկային նյութի տարանցման բազում ռիսկեր: Այս առումով, մենք մեր լուման կարող են բերել այս գործին»,- ասաց մեր զրուցակիցը:
Կարդացեք նաև
Հաագայում կայանալիք միջոցառմանը ներկա կգտնվեն մոտ հիսուն երկրների լիդերներ, այդ թվում նաեւ ԱՄՆ նախագահ Բարաք Օբաման: Համաժողովին ներկա կլինի նաեւ ՀՀ նախագահ Սերժ Սարգսյանը:
Դեսպան Հանս Հորբախը Հայաստանում է`հասկանալու եւ հստակեցնելու համար, թե ի՞նչ ներդրում կարող է ունենալ Հայաստանն այս գործում:
Նելլի ԳՐԻԳՈՐՅԱՆ