«ՅՈՒԿՕՍ» նավթային ընկերության նախկին սեփականատեր Միխայիլ Խոդորկովսկին հայտնել է, որ Ղրիմը պետք է մնա Ուկրաինայի կազմում՝ ստանալով «հնարավորինս լայն ինքնավարություն»: Փոխանցում է «Լենտա.ռու» լրատվականը:
Մարտի 10-ին Կիևի պոլիտեխնիկի ինստիտուտում տված դասախոսության ժամանակ Խոդորկովսկին կարծիք է հայտնել, որ Ղրիմը կարող է Ուկրաինայի կազմում լինել այնպես, ինչպես Շոտլանդիան Մեծ Բրիտանիայի.
«Ղրիմը Ռուսաստանի համար ավելի շատ բեռ է, քան ձեռք բերում», – ասել է նա, – «[թերակղզին] ռուսների համար սրբավայր է և ԽՍՀՄ փլուզումից հետո ամենաչամոքված վերքը»:
Ըստ Խոդորկովսկու, Ուկրաինայի իշխանափոխությունը կարող է հանգեցնել ամբողջ եվրոպական քաղաքականության վերաձևավորմանը: Նա կոչ է արել ուշադրություն դարձնել ուկրաինական հեղափոխության սխալներին՝ ընդգծելով, որ Մայդանի որոշ ակտիվիստների արմատական հայացքների պատճառով երկիրը կանգնած էր քաղաքացիական պատերազմի եզրին:
Կարդացեք նաև
Ռուս գործարարը Կիև է ժամանել մարտի 8-ին: Նա ելույթ է ունեցել Անկախության հրապարակում, որտեղ մեղադրել է ռուսական հեռուստաալիքներին ստեր տարածելու մեջ ու պնդել, որ Մոսկվան աջակցել է Կիևի ցուցարարներին բռնի ուժով ցրելուն:
Միխայիլ Խոդորկովսկին խարդախությունների, փողերի լվացման համար 10 տարի գտնվում էր ազատազրկման մեջ: 2013թ. Ռուսաստանի նախագահ Վլադիմիր Պուտինը նրան ներում է շնորհել:
Պատրաստեց Հովհաննես ԻՇԽԱՆՅԱՆԸ
