Այսօր Վարչական դատարանում հետաձգվեց ոստիկանության ծառայողի օրինական պահանջը չկատարելու համար ՀՀ քաղաքացի Վահագն Մինասյանին վարչական պատասխանատվության ենթարկելու պահանջով գործի քննությունը:
Ակտիվիստի ներկայացուցիչ Արտակ Զեյնալյանը հակընդդեմ հայց էր ներկայացրել ոստիկանությանը` պահանջելով ոստիկանների գործողությունները ճանաչել ոչ իրավաչափ եւ ճանաչել Վահագն Մինասյանի իրավունքների խախտման փաստը:
Դատարանը հակընդդեմ հայցը ընդունել էր վարույթ եւ փոստով առաքել կողմերին, ինչը ստացել էր միայն ոստիկանությունը եւ այսօր դատարան բերել հակընդդեմ հայցի պատասխանը:
Դատարանը, նիստը հետաձգելով մինչեւ մայիսի 19-ը, ժամանակ տրամադրեց հայցվոր կողմին` ծանոթանալու ոստիկանության պատասխանին եւ իրավական դիրքորոշում ձեւավորել:
Կարդացեք նաև
Հիշեցնենք, որ այսօր դատարանում ոստիկանությունն ընդդեմ Վահագն Մինասյանի երկու գործ էր քննվում, նույն պահանջով ու նույն օրվա դեպքերի վերաբերյալ: Մեկը քաղաքապետարանի դիմաց ապօրինի քնելու համար, մյուսը` օրը ցերեկով քաղաքապետարանի աշխատակիցների աշխատանքը խոչընդոտելու համար:
Պարոն Զեյնալյանի բնորոշմամբ իր պաշտպանյալի դեմ Հայաստանի Հանրապետությունն է դուրս եկել. «Նրա նկատմամբ հետապնդումը Հայաստանի Հանրապետությունն է իրականացնում»:
Արփինե ՍԻՄՈՆՅԱՆ
