Այսօր մամուլի մի քանի միջոցներ անդրադարձել էին քաղաքաշինության նախարար Սամվել Թադեւոսյանի առողջությանը:
Մասնավորապես, NEWS.am-ին առողջապահության նախարարության գլխավոր անեսթեզիոլոգ-ռեանիմատոլոգ Անատոլի Գնունին ասել էր, որ «մի քանի օր է՝ ինչ Սամվել Թադեւոսյանը գտնվում է հիվանդանոցում, սակայն ախտորոշումը չի կարող ասել, քանի որ հիվանդից թույլտվություն չի հարցրել»:
Բժիշկը նաեւ ասել էր, որ նախարարը ոչ թե Վերակենդանացման բաժանմունքում է, այլ Սրտաբանական բաժանմունքում՝ հիվանդասենյակում:
«Առավոտի» հետ զրույցում նախարարի մամուլի քարտուղար Լուսինե Մարգարյանը հստակեցրեց, որ «քաղաքաշինության նախարար Սամվել Թադևոսյանը ընդամենը 2 օր է «Նաիրի» բժշկական կենտրոնում, եւ ընդամենը պրոֆիլակտիկ-ամբուլատոր ստուգումների է ենթարկվում՝ շարունակելով աշխատանքային ռեժիմը:
Կարդացեք նաև
Ի դեպ, ըստ Լուսինե Մարգարյանի՝ վաղն արդեն` ամենայն հավանականությամբ` նախարարը կանցնի իր սովորական աշխատանքային ռեժիմին:
Հիշեցնենք, որ նախորդ տարեսկզբին նախարարը սրտի վիրահատություն էր տարել, եւ պրոֆիլակտիկ ստուգումները այդ պարագայում պարտադիր են:
Մելանյա ԲԱՐՍԵՂՅԱՆ
