Ոչ իշխանական 4 ուժերի` կառավարությանն անվստահություն հայտնելն ինչո՞վ կավարտվի, ի՞նչ արդյունք կունենա, այսօր Aravot.am-ն այս հարցն ուղղեց ՀՀԿ պատգամավոր Վարդան Այվազյանին եւ ԲՀԿ պատգամավոր Միքայել Մելքումյանին: «Մեր հարգարժան գործընկերներն առաջարկություն են ներկայացնում, ասում են` մարդուն փոխենք, չեն ասում` ի՞նչ անենք միասին: Հարգելիներս, անվստահություն ներկայացնելու մեխանիզմ գոյություն ունի, դա բարի ցանկություն չէ, քաղաքականությունը հնարավորությունների արվեստ է, այսինքն` դա հնարավոր պետք է լինի: Քաղաքական այդ 4 ուժերը դեռ շատ շուտվանից իրար հետ մտել են համագործակցության մեջ ու կառավարության ցանկացած լուրջ գործառույթին իրենք դեմ են քվեարկում. պետական բյուջե` դեմ են, կառավարության ծրագիր` դեմ են քվեարկում: Իրենք չունեն մեծամասնություն, ինչքան էլ ուզում են հավաքվեն, անվստահություն ներկայացնեն»:
ԲՀԿ պատգամավոր Միքայել Մելքումյանն էլ կառավարությանն անվստահություն հայտնելու մասին ասաց. «2012 թվականի ընտրություններից հետո «Բարգավաճ Հայաստանը» իշխող կոալիցիայի մաս էր կազմում, այդ ընթացքում երկիրն ունեցել է որոշակի զարգացումներ, հետագայում «Բարգավաճ Հայաստանը» գտել է, որ երկիրը գնում է ոչ ցանկալի ուղղությամբ, եւ այդ փուլում՝ 2012 թվից հետո էլ առաջարկ է եղել կոալիցիա մտնենք, մենք չմտանք: ԲՀԿ-ն կոալիցիայի մեջ քաղաքական գործունեության վրա ազդեցության չափեր չուներ այնքան, որքան ինքը քվե է ստացել: Մենք 2 տարի քաղաքակիրթ ենք գործել, համագործակցելով քառյակի հետ մենք ակտիվացնում ենք մեր գործունեությունը, գնահատական ենք տալիս կառավարության գործունեությանը, գնահատական, ոչ թե մերկապարանոց ասում ենք` սա էլ է քիչ, ասենք` կառավարություն, ա’յ դու սենց ես արել, դե գնա հիմա: Հարց եմ տալիս` դու ո՞վ ես, ի՞նչ ես անելու, ի՞նչ երաշխիք, որ անելու ես»:
Պարոն Մելքումյանի խոսքին միջամտեց պարոն Այվազյանն ու հեգնանքով ավելացրեց` «Հիմա կարող ենք արձանագրել, որ դուք օպոզիցիա՞ եք, այլընտրա՞նք, կողմնորոշվեք»:
Aravot.am-ի ճշտող հարցին, քառյակի ներկայացուցիչներն ասում են` կոնսոլիդացիան ենթադրում է իշխանափոխություն` նախագահի եւ խորհրդարանական արտահերթ ընտրություններ, արդյոք ՀՀ նախագահի հրաժարականն էլ կպահանջեն, Միքայել Մելքումյանն ասաց. «Մենք 4 ուժերով կունենանք միասնական տնտեսական ծրագիր»:
Կարդացեք նաև
Իսկ պարոն Այվազյանը նորից հեգնանքով ասաց` «Միասնական մեկ ցուցակով հանդես կգաք ընտրությունների ժամանակ»: «Մինչեւ 2017 թվի ընտրություն չի հասնի, այդ ծրագրով հանդես կգանք ու Սահմանադրության շրջանակներում կգործենք»,-նշեց պարոն Մելքումյանը:
Վարդան Այվազյանն էլ հաստատեց ու էլի հեգնանքով` «Մինչեւ ընտրություն չեն հասնի, քարուքանդ կլինեն»:
Որքան էլ, որ Մելքումյանը փորձում էր գեղեցիկ ներկայացնել իրենց քայլերը, որ Մայդան չեն ուզում լինի, անձերի խնդիր չեն դնում, ՀՀԿ պատգամավոր Վարդան Այվազյանը մեկ արտահայտությամբ վերջ դրեց ԲՀԿ-ի ծրագրերի Սահմանադրական ճանապարհով իրագործմանը. «Հայաստանի հանրապետական կուսակցությունը, նույնիսկ առանց ՕԵԿ-ի, ունի քաղաքական մե-ծա-մաս-նու-թյուն»:
Մանրամասները` տեսանյութում
Նելլի ԲԱԲԱՅԱՆ
Չմտածեք, պատերազմի նավը կմոտենա կառամատույցին և առնետները…ու…օյ, օյ, օյ…
Քարուքանդ լինելիս բոլորով, թացով ու չորով, ղաղաղայով ու հայոց գրավյալ պետությունով: