Մարտի 1-ի հանրահավաքում առաջին նախագահ Լեւոն Տեր-Պետրոսյանը հայտարարել էր, թե 1999-ից հետո առաջին անգամ է, որ խորհրդարանում լուրջ քաղաքական քննարկումներ ու բանավեճեր են լինում, առաջին անգամ ընդդիմությունը հիմնավոր ու փաստարկված է քննադատում:
Մարտի 21-ին Aravot.am-ի հետ զրույցում մեր հարցին՝ համաձա՞յն եք Լեւոն Տեր-Պետրոսյանի այդ գնահատականի հետ՝ «Ժառանգության» առաջնորդ Րաֆֆի Հովհաննիսյանը պատասխանեց. «Իհարկե, համաձայն չեմ: Կարծում եմ, որ շատ ընտրովի, սելեկտիվ եւ կուսակցականացված մոտեցում է: Հենց «Ժառանգությունն» էր, որը առաջինը մտավ՝ որպես ակտիվ եւ ընդդիմադիր ուժ խորհրդարանում եւ թե՛ Երեւանի փողոցներում, թե՛ քաղաքացիների այս կամ այն հարցը պաշտպանելու նպատակով Ստրասբուրգում եւ այլուր Հայաստանի ժողովրդավարության,ազատությունների, Մարտի 1-ի հարցով ինքը պայքարեց եւ պնդեց: Կարող է նման կուսակցականացված միջավայրում ասել, որ մենք ենք, որ կանք, բայց ես չեմ կարծում, որ դա ամբողջական է: Իհարկե, իրենց մոտ էլ կան գործիչներ, որոնք խելամիտ են, նվիրված են, բայց միգուցե ինքը պարզապես մոռացավ, որ մի ամբողջ շրջան կար, որ այլ խմբակցություն էր ներկայացնում ՀՀ-ի ժողովուրդը, ընդդիմադիր հատվածին եւ որեւէ ուժ ու ջանք չէր խնայում՝ ՀՀ քաղաքացու շահն ապահովելու թե՛ մեր երկրում, թե՛ արտասահմանում: Մարտի 1-ի պահով բոլորս հիշում ենք, որ հենց «Ժառանգության» պատգամավորները ներկա էին»:
Րաֆֆի Հովհաննիսյանը վստահեցրեց, որ առաջին նախագահն իր այդ հայտարարությունն անելիս առաջնորդվել է կուսակցականացված մոտեցմամբ եւ ասաց. «Միգուցե հաջորդ անգամ ինքը կարողանա ուղղել այդ վակուումը հիշողության մեջ»:
Կարդացեք նաև
Հռիփսիմե ՋԵԲԵՋՅԱՆ
