ՀՀ առողջապահության նախարար Դերենիկ Դումանյանի մոտ այսօր կայացած բժշկական օգնության որակի և կոռուպցիոն ռիսկերի վերահսկման նպատակով ստեղծված հանձնաժողովի հերթական նիստում քննարկվեցին դեղերի ոլորտին առնչվող հարցեր։ ՀՀ ԱՆ դեղերի բժշկական տեխնոլոգիաների փորձագիտական կենտրոնի փոխտնօրեն Լիլիթ Ղազարյանը, ներկայացնելով «Դեղերի մասին» ՀՀ օրենքի նախագիծը, հիշեցրեց, որ նորանկախ Հայաստանի Հանրապետության առաջին օրենքներից մեկը եղել է «Դեղերի մասին» ՀՀ գործող օրենքը, որը երկար տարիներ կանոնակարգել է ոլորտը` երկիրը զերծ պահելով անարդյունավետ ու վտանգավոր դեղերից։ Սակայն այսօր այն հնարավորություն չի ընձեռում ապահովելու դեղի շրջանառության պատշաճ գործունեության միջազգային այժմյան չափորոշիչների ապահովումը։ Նաև բացակայում են ենթաօրենսդրական շատ փաստաթղթերի հիմքերը։
«Այս դաշտում առկա հիմնախնդիրներին հիմնավոր լուծումներ տալու ճիշտ ճանապարհը ոլորտի մայր օրենքի հիմնարար փոփոխությունն էր։ Նոր օրենքի նախագիծը երկար ժամանակ լուրջ քննարկումների առակա է դարձել։ Այն քննարկել ենք Հայաստանի դեղագործության ոլորտի կազմակերպությունների, տեղական արտադրողների, արտասահմանյան դեղագործական ընկերությունների հայաստանյան ներկայացուցչությունների, ներմուծող ընկերությունների, փորձագետների ու իրավաբանների հետ։ Արդյունքում լավ մշակված փաստաթուղթ ունեցանք։ Ոլորտում առկա գրեթե բոլոր խնդիրները կանոնակարգվում են։ Կարևորն այն է, որ նոր օրենքը հնարավորություն կտա ապահովելու դեղի` արտադրողից մինչև սպառողին հասնելու անվտանգ շղթա»,-ասաց նախարարը։
Հանձնաժողովի անդամները նկատեցին, որ մանրակրկիտ աշխատանքի արդյունքում ստեղծվել է մի նախագիծ, որն իրավական դաշտ կստեղծի ազգաբնակչությանն ինչպես որակյալ և անվտանգ դեղերով ապահովելու, այնպես էլ սոցիալական խնդիր լուծելու համար։
Այնուհետև ՀՀ դեղարտադրողների և ներմուծողների ասոցիացիայի (ԴԱՆ միություն) տնօրեն Սամվել Զաքարյանը ներկայացրեց Հայաստանի դեղագործության ոլորտի մարկետինգային գործունեության կանոնագրքի նախագիծը։ Բանախոսն ընդգծեց, որ ԴԱՆ միության անդամ ընկերությունները, գիտակցելով իրենց վրա դրված սոցիալական բարձր պատասխանատվությունը, զարգացած երկրների օրինակով փորձում են ինքնակառավարման սկզբունքով մաքրել ու հստակեցնել դաշտը։ Կանոնագրքով սահմանվում է դեղի արտադրության, ներկրման և ողջ շրջանառության գործընթացը, այդ թվում՝ գովազդը, արտադրանքի խթանումն ու վաճառքը, իրականացնել բարեխիղճ մրցակցության պայմաններում՝ առանց վնասելու մրցակիցների հեղինակությունը, դիրքը և տնտեսական շահերը։ Նախատեսված է նաև վեճերի կարգավորման հանձնաժողովի ստեղծում։
Հանձնաժողովում ընդգրկված միջազգային և տեղական հասարակական կազմակերպությունների ներկայացուցիչները հավանության արժանացրին ներկայացված փաստաթուղթը։
ՀՀ առողջապահության նախարարություն
