Այս պահին ԵԽԽՎ գարնանային նստաշրջանը շարունակում է աշխատանքները: ԵԽ մարդու իրավունքների հանձնակատար Նիլս Մուժնիկսը ներկայացրեց մարդու իրավունքների պաշտպանության ոլորտում տարեկան զեկույցը, այնուհետև պատասխանեց ԵԽԽՎ պատվիրակների հարցերին:
Հայաստանի պատվիրակության անդամ ԲՀԿ խմբակցության քարտուղար Նաիրա Զոհրաբյանը բարձրացրեց Ադրբեջանում գերի ընկած հայ զինծառայող Հակոբ Ինջիղուլյանի՝ Հայաստան վերադարձի խնդիրը: Նա մտահոգություն հայտնեց, թե Ադրբեջանում գտնվող հայ ռազմագերիների կյանքին լուրջ վտանգ է սպառնում, նրանք ենթարկվում են ֆիզիկական և բարոյական բռնությունների, ուստի ի՞նչ է անում Վեհաժողովը այպիսի երևույթները կանխելու և դատապարտելու համար:
Հիշեցնենք, որ Նաիրա Զոհրաբյանը մարտի 5-ին դիմել էր Նիլս Մուժնիկսին՝ խնդրելով իր լիազորությունների շրջանակներում օգնել, որ Հակոբ Ինջիղուլյանը հայրենիք վերադառնա կամ փոխանցվի երրորդ երկրին: Ի պատասխան հայ պատվիրակի բարձրացրած մտահոգության՝ ԵԽ հանձնակատարը նշեց. «Այս հարցերում համագործակցությունը շարունակվում է Կարմիր խաչի միջազգային կոմիտեի հետ: Կարծում եմ ՝ Կարմիր խաչն է այն պատասխանատու և իրավասու մարմինը, որը զբաղվում է այդ հարցերով: Ինչպես Ադրբեջանը, այնպես էլ Հայաստանն ու ԵԽ մյուս անդամ երկրներն իրենց գործունեությունը պետք է ծավալեն Մարդու իրավունքների եվրոպական կոնվենցիայի դրույթների սահմաններում: Երբ մայիսին գտնվում էի Ադրբեջանում, այնտեղ քննարկումներ ունեցել եմ այս հարցերի շրջանակներում»:
Կարդացեք նաև
Տաթև ՀԱՐՈՒԹՅՈՒՆՅԱՆ
