Քանի դեռ ծնեբեկի սեզոնը չի ավարտվել, պետք է առիթից օգտվել, եւ որքան հնարավոր է շատ ծնեբեկ ուտել: Այն եւ շատ համեղ է եւ շատ օգտակար:
Ծնեբեկը կարելի է օգտագործել սալաթների մեջ, կարելի է պարզապես 1-2 րոպեով խաշել աղ արած ջրում, վրա լիմոն կամ քացախ անել եւ ուտել: Կարելի է պատրաստել նաեւ ապուր-պյուրե:
Անհրաժեշտ մթերքները
Ծնեբեկ-2-3 կապ
Կարդացեք նաև
Սառեցված ոլոռ- 1 տուփ կամ կարտոֆիլ՝ 2 հատ
Բարձր յուղայնությամբ կաթնասեր (սերուցք)-200 գրամ
Կարագ- 50 գրամ
Պատրաստման եղանակը
Ծնեբեկի տակի մասից, մոտ 1 սմ-ի չափ կտրել, թափել: Մնացածը բաժանել երկու մասի՝ գլխիկները թողնել, իսկ պոչերը լցնել կաթսայի մեջ: Ի դեպ, եթե պոչի վրա թեփուկները շատ են, կարտոֆիլ մաքրող դանակով մաքրեք վրայի շերտը, այլապես ապուր-պյուրեի մեջ տհաճ կերպով կմնա ատամի տակ: Իսկ եթե շատ երկար են, երկու կտոր արեք:
Ծնեբեկի պոչերի վրա երկու բաժակ սառը ջուր լցնել, դնել կրակին: Հենց սկսի եռալ, աղ անել, ավելացնել սառեցված ոլոռը: Երկու րոպեից անջատել կաթսան: Եթե չունեք սառեցրած ոլոռ, ապա կարող եք նախապես կարտոֆիլը խաշել, հենց լավ փափկի, լցնել ծնեբեկի պոչերը, երկու րոպե եռալուց հետո անջատել: Ոլոռով եփվելու դեպքում շատ գեղեցիկ կանաչ գույն կունենա, իսկ կարտոֆիլով եփվելու դեպքում՝ բաց կանաչ կլինի:
Ինչպես նկատեցիք, ոչ մի այլ մթերք չենք օգտագործում, ոչ սոխ, ոչ սխտոր, ոչ համեմուքներ՝ բացի աղից: Ծնեբեկի համն ու հոտն այնքան հարուստ են, որ չարժե կոտրել այլ համերով: Սակայն, բնականաբար, այստեղ եւս՝ ճաշակի հարց է, եթե ավելի սուր համեր եք նախընտրում, կարող եք մեկ-երկու ճյուղ կանաչ սոխ եւ մեկ ճյուղ կանաչ սխտոր ավելացնել:
Երբ եփված բանջարեղենը մի փոքր կսառչի, լցնել բլենդերի մեջ՝ այն ջրի հետ, որի մեջ եփվել եւ լավ խառնել: Եթե ժամանակ եւ տրամադրություն ունեք, կարող եք հետո անցկացնել մաղով, այդ դեպքում շատ նուրբ կստացվի ձեր ապուր-պյուրեն, բայց եթե անգամ չանցկացնեք էլ մաղով, էլի շատ համեղ է:
Հարված բանջարեղենը հետ լցնել կաթսայի մեջ, վրան կարագ ավելացնել, 100 գրամ սերուցք, ու նորից դնել կրակին՝ լավ տաքանա, բայց մի հասցրեք եռման աստիճանի:
Լցրեք ափսեների մեջ եւ մատուցեք: Ապուրի վրա կարող եք դնել ծնեբեկի թարմ, չեփված գլխիկներից, ավելացնել մեկ գդալ սերուցք եւ տաքացրած հացի կտոր: Շատ գեղեցիկ կլինի:
Ի դեպ, եթե նկատեցիք, մենք այս բաղադրատոմսում չօգտագործեցինք ծնեբեկի գլխիկները, դրանցից դուք կարող եք աղցան պատրաստել՝ թարմ լոլիկ, թարմ ծնեբեկ, ձիթապտղի յուղ, ձիթապտղի հատիկներ, քերած պարմեզան…
Բարի ախորժակ
